ԵՐԵՎԱՆ, 8 սեպտեմբերի - Sputnik. «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի տնօրեն Արա Թարվերդյանը ֆեյսբուքյան էջում տեղադրված տեսանյութում մանրամասներ է պատմել «Գառնի» արգելոցում տեղի ունեցած աղմկահարույց հարսանիքից։
Նա նաև հայտարարել է, որ շատ ավելի վաղ, քան հարսանիք անցկացնելու համար դիմել են իրենց, ինքը դիմում է գրել աշխատանքից ազատվելու մասին։ Դիմումը թվագրված է հուլիսի 14-ով։ Իսկ թե ինչու է այսքան ուշանում նախարարի՝ ազատման հրամանը, Արա Թարվերդյանը կապում է ընդունման-հանձնման հետ կապված գործընթացով, որը, իր կարծիքով, կավարտվի սեպտեմբերի վերջին կամ հոկտեմբերի սկզբին։
«Պաշտոնից իմ ազատումը խնդրում եմ չկապել «Գառնի» արգելոցում տեղի ունեցածի հետ»,-հայտարարել է Թարվերդյանը։
Հիշեցնենք՝ սեպտեմբերի 4-ին ԶԼՄ–ներում տեսանյութ էր հրապարակվել, որում երևում էր Գառնիի հեթանոսական տաճարը, լսվում էր ռաբիս երաժշտություն։ ԿԳՄՍ նախարարության «Պահպանության ծառայություն» ՊՈԱԿ-ը հայտարարություն տարածեց, թե ռաբիսը ոչ թե տաճարի տարածքից, այլ հարակից օբյեկտից է լսվում, իսկ իրենք էլ միջոցառման մասին տեղեկացրել են լիազոր մարմնին և թույլտվություն ստացել։
Ավելի ուշ պաշտոնական հաղորդագրությամբ հանդես եկավ Հայաստանի տուրիզմի կոմիտեն։ Նշվում էր, որ Գառնիի հեթանոսական տաճարում անցկացված փակ միջոցառման կապակցությամբ բազմաթիվ բողոքներ են ստացվել ոլորտի ներկայացուցիչների կողմից։
Գառնիի համայնքապետարանն էլ տեղեկացրել էր, որ տեղյակ է եղել Գառնիի հեթանոսական տաճարի տարածքում սեպտեմբերի 4-ին կայանալիք միջոցառման մասին և դեմ է արտահայտվել։