ԵՐԵՎԱՆ, 8 սեպտեմբերի - Sputnik. «Կորսան-Կորվիամ Կոնստրուկցիոն» իսպանական ընկերության հետ դատական գործի շրջանակներում քննության համար ՀՀ կառավարությունը հատկացրել է գրեթե 1,2 մլն դոլար։ Հարցը ներառված էր ՀՀ կառավարության այսօրվա նիստի օրակարգում` չզեկուցվող հարցերի մեջ:
Միջոցները կփոխանցվեն Միացյալ Թագավորությունից «Արկադիս Քոնսալթինգ» կազմակերպությանը, որը պետք է իրականացնի հետազոտություն, վերլուծություն և փորձագիտական եզրակացություն տրամադրի Հյուսիս-հարավ միջանցքի կառուցման շրջանակներում 1-ին և 2-րդ ներդրումային ծրագրերի վերաբերյալ:
Իրավական վեճերը ծագել են ՀՀ տրանսպորտի և կապի նախարարության և «Կորսան-Կորվիամ Կոնստրուկցիոն» ընկերության միջև 2012թ. ապրիլի 27-ին կնքված թիվ T1-T2-CW-01 պայմանագրի շրջանակներում։
«Արկադիս Քոնսալթինգ» սահմանափակ պատասխանատվությամբ ընկերության հետ Հայաստանը կնքել է փորձագիտական ծառայությունների 1,175,000 ԱՄՆ դոլար (587 մլն 500 հազար դրամ) արժողությամբ գնման պայմանագիր:
2018 թվականի սեպտեմբերին Գլխավոր դատախազությունը հայտնաբերել էր շինարարության ընթացքում ֆինանսական խախտումներ: Քննության արդյունքում քրեական գործ է հարուցվել և ուղարկվել Քննչական կոմիտե: Պետությանը հասցված վնասը գնահատվել է գրեթե 50 մլն դոլար: