ԵՐԵՎԱՆ, 7 սեպտեմբերի - Sputnik. Շոտլանդիայի Օրկնեյան կղզիներում գտնվող դամբարանում հնագետների խումբը երկու խորհրդավոր փայլեցված գունդ է հայտնաբերել, որոնք, ըստ ամենայնի, ավելի քան 4 հազար տարեկան են։ Տեղեկությունը հայտնում է ՌԻԱ Նովոստին՝ հղում անելով Daily Mail-ին: Գնդերը մոտ հինգ սանտիմետր տրամագիծ ունեն։
Թե ինչի համար են դրանք նախատեսված, դեռ պարզ չէ։ Մասնագետները ենթադրում են, որ գնդերը կարող էին օգտագործվել որպես զենք, ծեսերի կամ գուշակությունների առարկաներ, ինչպես նաև կաշվի մշակման ու նույնիսկ շինարարական բլոկների տեղափոխման համար: Օրկնեյան կղզիներում ընդհանուր առմամբ հայտնաբերվել է նեոլիթյան դարաշրջանի մոտ 20 նման գունդ, որոնցից յուրաքանչյուրը գիտնականները «ցնցող գտածո» են համարում։
Բացի գնդերից, հետազոտողները գտել են մարդկանց ու կենդանիների մնացորդներ, խեցեղեն ու տարբեր քարե արտեֆակտներ՝ դանակներ, մուրճեր, կաթսաների կափարիչներ ու նետերի ծայրեր:
Այս տարի հնագետները մտադիր են շարունակել ուսումնասիրել դամբարանի խցերի պարունակությունն ու փորձել պարզել, թե ինչ սկզբունքով են այն կառուցել: