Բուժհաստատություններում պետպատվերի շրջանակում մատուցվող ծառայությունների բյուջետային ծրագրում առաջացած խնդրի հիմքում չպլանավորված ու չհամակարգված աշխատանքն է։ Sputnik Արմենիայի հետ զրույցում նման կարծիք հայտնեց առողջապահության փորձագետ Դավիթ Մելիք-Նուբարյանը` մեկնաբանելով լրատվամիջոցներում տարածված տեղեկությունը, թե մինչև 2022 թվականը պետպատվերով բուժումները սառեցվել են։
«Դա միակ բյուջետային ծրագիրն է, որտեղ նախորդ տարիներին կատարվեցին լուրջ փոփոխություններ, եթե հիշում եք` խոսում էին շահառուների, մատուցվող ծառայությունների ընդլայնման մասին։ Բայց քանի որ երկարաժամկետ պլանավորումն այնքան էլ լավ չէր արվել` բախվեցինք այս խնդրին»,- ասաց նա։
Ըստ փարձագետի` բուժհիմնարկները նախորդ տարիներին պայմանագրով սահմանված չափից ավելի այցելուներ են ընդունել և դրա դիմաց նախարարությունից լրացուցիչ ֆինանսավորում ստացել։ Նաև դրա հետևանքով է նախարարությունը որոշել այլևս լրացուցիչ ֆինանսական միջոցներ չհատկացնել։
«Նախարարությունն ասում է` ձեզ էլ փող չեմ տալու, պետպատվերները նախատեսված չափով արեք, իսկ եթե, օրինակ, սեպտեմբերի համար համամասնությունները սպառված են, հերթագրեք հոկտեմբերին կամ հաջորդ ամիսներին»,- պարզաբանեց Մելիք-Նուբարյանը։
Նրա խոսքով` նմանատիպ խնդիր բոլոր կառավարությունների օրոք էլ եղել է։ Բոլոր դեպքերում ամենաշատը տուժել և տուժում են շահառուները։ Նույնիսկ նրանք, ովքեր պիտի պլանային հետազոտություններ անցնեն։
«Հայաստանում այդ սխեման է աշխատում։ Պետք է համակարգը փոխել, անցնել ապահովագրական համակարգի, երբ ապահովագական ընկերություններն արդեն ի զորու կլինեն ծառայությունների որակը հսկել»,- նշեց փորձագետը։
Նշենք, որ այսօր լրատվամիջոցներում տեղեկություններ տարածվեցին, որ օգոստոսի 1-ից առողջապահության նախարարությունը հրաժարվում է պետպատվերով սպասարկել վիրավոր զինծառայողներին և հատուկ խմբերում ընդգրկվածների սրտի վիրահատություններն ու դժվարամատչելի ախտորոշիչ հետազոտությունները, որի մասին ներքին կարգով գրություն է իջեցվել ԲԿ-ներին: