ԵՐԵՎԱՆ, 5 սեպտեմբերի - Sputnik․ Բրիտանական SAS հատուկ նշանակության ջոկատի էլիտար ստորաբաժանումը Աֆղանստանից փախել է կանացի հագուստով։ Տեղեկությունը հաղորդում է Daily Express-ը: Հատուկջոկատայինները կարողացել են խորամանկորեն խաբել թալիբներին և անվտանգ լքել երկիրը։
Պարզվում է, որ բրիտանական հրամանատարությունը մոտ 20 մարտիկների բախտի քմահաճույքին է թողել՝ նրանց տրանսպորտ չտրամադրելով։ Այդ պատճառով երկրի հարավում գտնվող հատուկ ջոկատայինները ստիպված են եղել ինքնուրույն հասնել Քաբուլ՝ գործի դնելով իրենց երևակայությունը։
Պարբերականը պնդում է, որ բրիտանացի հատուկջոկատայինները թողել են տեխնիկայի մեծ մասը, իսկ թալիբների տեղադրած անցակտերով անցել են կանացի զգեստներով ՝ ծածկելով նաև իրենց դեմքերը։ Նշվում է, որ նրանք ոչ մի անգամ գրոհայինների մոտ կասկած չեն հարուցել։
Հիշեցնենք՝ «Թալիբան» (Ռուսաստանում և մի շարք երկրներում արգելված ահաբեկչական կազմակերպություն) շարժման գրոհայինները օգոստոսի 15-ին մտել են Աֆղանստանի մայրաքաղաք և վերահսկողության տակ վերցրել նախագահական պալատը:
Օգոստոսի 16-ի գիշերը թալիբների քաղաքական կազմակերպության ներկայացուցիչ Մուհամեդ Նաիմը հայտարարել է, որ Աֆղանստանում պատերազմն ավարտված է, իսկ երկրում կառավարման ձևը պարզ կլինի մոտ ժամանակներս: Նրա վերահսկողությունից դուրս մնացած միակ նահանգը Փանջշերն է։
Սակայն այսօր Աֆղանստանի Փանջշեր նահանգում դիմադրության ուժերի ներկայացուցիչ Ֆահիմ Դաշտին հայտարարել է, որ իրենք կրկին վերահսկում են նահանգի արևելյան մասում գտնվող Պարյան բարձրլեռնային շրջանը: