ԵՐԵՎԱՆ, 4 սեպտեմբերի – Sputnik. Տավուշի սահմանամերձ Բերդավան գյուղում Արցախյան պատերազմում զոհված Գրիշա Ազատյանի եղբայրն է այսօր լույս աշխարհ եկել։ Ուրախ լուրը հայտնում է Բերդավան համայնքի ֆեյսբուքյան էջը։
«Մեծ հպարտությամբ, սրտի թրթիռով և անասելի հուզմունքով հայտնում ենք այսօրվա լավ լուրը։ Ազատյանների ընտանիքում այսօր լսվեց նորածին մանկան ճիչը՝ Արցախյան պատերազմի հերոս Գրիշա Ազատյանի եղբայրը՝ Նարեկ Գագիկի Ազատյանը ժամեր առաջ լույս աշխարհ եկավ՝ ընտանիքին տալով հույսի շող և ապրելու ձգտում»,–գրել են Ազատյանների ընտանեկան լուսանկարին կից։ Նկարում նրանք պատերազմում անմահացրած որդու հետ են։
Լրագրող Ոսկան Սարգսյանն էլ Facebook–ի իր էջում հայտնել է, որ երեխան ծնվել է Նոյեմբերյանի բժշկական կենտրոնում, 3 կգ 800 գրամ քաշով։ Նա նաև տեղեկացրել է, որ 44 օրյա պատերազմում զոհված, սահմանամերձ Բերդավան գյուղի 19-ամյա բնակիչ Գրիշան ընտանիքի միակ որդին էր, Ազատյաններն ունեն նաև 22 տարեկան դուստր։