ԵՐԵՎԱՆ, 1 սեպտեմբերի - Sputnik. Ռուսաստանի նախագահ Վլադիմիր Պուտինը մանուկ ժամանակ երազում էր նավաստի, օդաչու ու հետախույզ դառնալ։ ՌԴ նախագահն այս մասին ասել է «Օկեան» համառուսաստանյան մանկական կենտրոնի դպրոցի աշակերտների հետ հանդիպման ժամանակ։ Հանդիպումը հեռարձակում էր «Ռոսիա 24» հեռուստաալիքը։
«Շատ տղաների պես մե՛կ ուզում էի նավաստի լինել, մե՛կ օդաչու, հետո հետախույզ։ Հետախույզ դառնալու նախագիծս իրականացրեցի, կյանքս այդպես դասավորվեց։ Երբեմն նույնիսկ զարմանում եմ, թե ինչպես է այդպես ստացվել։ Դա ընդհանրապես բարդ գործ է, չի կարելի պարզապես գալ ու ասել՝ ուզում եմ հետախույզ լինել, ու քեզ վերցնեն։ Այդպես կարծես չի լինում, բայց ինձ մոտ այդպես ստացվեց», — ասել է Պուտինը։
Նախագահը նշել է` կարևոր էր, որ և՛ դպրոցը, և՛ ընտանիքը, և՛ շրջապատը միտված են եղել, որ ինքն իրեն նվիրի հայրենիքին ծառայելուն: «Եվ այսօր ես հենց դրանով եմ զբաղված։ Կարծում եմ, որ այդ իմաստով ինձ հաջողվեց հասնել իմ երազածին», — ավելացրել է Պուտինը։
ՌԴ նախագահը դպրոցականների հետ զրույցում նշել է, որ ամենակարևորը նպատակ ունենալն է: Եթե այն պարզ ու հասկանալի է, ապա կան բոլոր հնարավորությունները դրան հասնելու համար։ Երկրորդ կարևորագույն բաղադրիչը, Պուտինի խոսքով, երազելուց չվախենալն է, սեփական ուժերին հավատալը, և այդ ժամանակ հաջողությունն ապահովված է։