ԵՐԵՎԱՆ, 1 սեպտեմբերի - Sputnik. Հյուսիսային Մակեդոնիա – Հայաստան խաղի նախօրեին՝ սեպտեմբերի 1-ին, Սկոպյեում կայացել է մեր հավաքականի գլխավոր մարզիչ Խոակին Կապառոսի և ընտրանու ավագ Հենրիխ Մխիթարյանի մամուլի ասուլիսը։
Հայաստանի ազգային հավաքականի ավագ Մխիթարյանը նշեց, որ մեր հավաքականը շատ լավ մեկնարկ է վերցրել. թիմը հիանալի է ելույթ ունեցել` հաղթելով առաջին երեք խաղերում։
«Վաղվա խաղին էլ Հայաստանի հավաքականը տրամադրված է շատ լուրջ և ձգտելու է հաղթանակի հասնել։ Թե ինչքանով դա մեզ կհաջողվի, ցույց կտա ժամանակը»,–ասաց Մխիթարյանը։
Նա նշեց, որ հաղթողի հոգեբանությունը մեր հավաքականում ձևավորվել է Ազգերի լիգայի մրցաշարում հաղթանակի հասնելուց հետո։
Մխիթարյանի խոսքով` ներկայում թիմում շատ լավ մթնոլորտ է ձևավորվել, իսկ Հայաստանի ազգային հավաքականի ֆուտբոլիստներն իրենց վարպետությամբ արդեն ապացուցել են, որ կարողանում են հաղթել։
Մխիթարյանը մտահոգություն հայտնեց, որ վաղվա խաղին չեն մասնակցելու երեք առանցքային ֆուտբոլիստներ` Վարազդատ Հարոյանը, Տիգրան Բարսեղյանն ու Խորեն Բայրամյանը։
«Հիմա մեր թիմում յուրաքանչյուրը կարող է և պետք է իր հետևից տանի իր խաղընկերներին։ Ես ինձ այդ գործում բացառություն չեմ համարում»,–ասաց Հայաստանի ազգային հավաքականի ավագը։
Հայաստանի ազգային հավաքականի գլխավոր մարզիչ Խոակին Կապառոսն իր հերթին նշեց, որ Հյուսիսային Մակեդոնիայի թիմի մասին շատ բարձր կարծիք ունի և հարգանքով է վերաբերվում մրցակիցներին։
«Նոր մարզիչի գործոնը թիմում ինչ– որ բան անկասկած փոխել է։ Բայց թիմում խաղում են Եվրոպայի առաջնությունում հանդես եկած ֆուտբոլիստների 80 տոկոսը, այնպես որ, մեծ փոփոխություն չեմ սպասում»,–ասաց Կապառոսը։
Նա նշեց, որ թիմային խաղի կողմնակից է` չժխտելով, որ Մխիթարյանը շատ ուժեղ ֆուտբոլիստ է և իր տաղանդը պետք է ծառայեցնի թիմի շահերին ու մեզ համար ցանկալի արդյունք ապահովելուն։
Հիշեցնենք` աշխարհի 2022 թվականի եվրոպական ընտրական J խմբում Հայաստանի հավաքականը երեք խաղ է անցկացրել ու ցույց տվել 100–տոկոսանոց արդյունք` հաղթելով Լիխտենշտեյնի, Իսլանդիայի և Ռումինիայի հավաքականներին։ Հյուսիսային Մակեդոնիայի ընտրանու հետ խաղում հաղթանակը մեր թիմին կամրապնդի խմբի առաջատարի դիրքում։