ԵՐԵՎԱՆ, 31 օգոստոսի – Sputnik. Լեռնային Ղարաբաղի ժողովրդի անվտանգությունն ապահովող ռուս խաղաղապահ զորախումբը բնականոն կյանքին վերադառնալու պայմաններ է ստեղծում։ ՌԴ արտգործնախարար Սերգեյ Լավրովի հետ ճեպազրույցի ժամանակ այսօր հայտարարեց ՀՀ ԱԳ նախարար Արարատ Միրզոյանը։
Նրա խոսքով` Ռուսաստանն առանցքային դեր է խաղացել Լեռնային Ղարաբաղի ժողովրդի դեմ սանձազերծած ադրբեջանական ագրեսիայի ժամանակ խաղաղության հաստատման գործում:
«Ռուսական խաղաղապահ ուժերի տեղակայումը` որպես Բաքվի կողմից սադրանքներ թույլ չտալու և Լեռնային Ղարաբաղի անվտանգությունն ապահովող գործոն, պայմաններ է ստեղծում բնականոն կյանքին վերադառնալու համար»,–ասաց Միրզոյանը:
Այս համատեքստում և գերիների հայրենիք վերադառնալու հարցում նա շնորհակալություն հայտնեց ռուսական կողմին և նախագահ Վլադիմիր Պուտինին ՝ հետևողական ջանքերի գործադրման համար։
«Հայաստանը բարձր է գնահատում ՌԴ դերը` նոյեմբերի 9-ի համաձայնագրի դրույթները կատարելու հարցում, հատկապես` գերիների վերադարձի առնչությամբ։ Չնայած դրան, Բաքուն մինչ օրս խախտում է հրադադարի համաձայնագրի մի շարք դրույթներ»,–ասաց Միրզոյանը։
Միրզոյանը նշեց` Հայաստանը պատրաստ է ակտիվ երկխոսություն սկսել տարածաշրջանում երկարատև խաղաղության ու ստաբիլ իրավիճակի հասնելու համար։ Նա հավելեց, որ ԼՂ հարցի` քաղաքական ճանապարհով լուծումն այդպես էլ բաց է մնացել։
Հիշեցնենք` 2020թ.–ի նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին ռազմական գործողությունների դադարեցման վերաբերյալ։
Եռակողմ հայտարարության մեջ մասնավորապես նշվում է, որ մինչև նոյեմբերի 15-ը Ադրբեջանին է վերադարձնում Քելբաջարը (ավելի ուշ այդ ժամկետը 10 օրով երկարաձգվեց-խմբ.), մինչև նոյեմբերի 20-ը՝ Աղդամի շրջանը, մինչև դեկտեմբերի 1-ը՝ Լաչինի շրջանը` թողնելով միջանցք 5 կմ լայնությամբ, որը ապահովելու է Հայաստանի կապը, սակայն չի շոշափելու Շուշին։
Հայաստանն ապահովում է տրանսպորտային կապ Ադրբեջանի արևմտյան շրջանների և Նախիջևանի Ինքնավար Հանրապետության միջև։
Շփման գծի երկայնքով Լեռնային Ղարաբաղում և Լաչինի միջանցքում հաստատվում են ռուսական խաղաղապահ ուժեր, որոնք մնում են հինգ տարի ժամանակով` ավտոմատ երկարացման հնարավորությամբ, եթե հաջորդ հինգ տարվա համար կողմերը ժամկետի լրանալուց վեց ամիս առաջ չեն հայտարարում այս դրույթի կիրառությունը դադարեցնելու մասին։