ԱԺ 8-րդ գումարման մշտական հանձնաժողովներում պետք է այնպիսին մթնոլորտ ստեղծել, որ հանձնաժողովների անդամները կարողանան առողջ քննադատություն ծավալել և սուր հարցադրումներ հնչեցնել։ Sputnik Արմենիայի հետ զրույցում նման կարծիք հայտնեց ԱԺ «Հայաստան» խմբակցության ղեկավար Սեյրան Օհանյանը։
«Այն հարցերում, որոնցում մենք համակարծիք չենք, քննադատելու ենք, այդ մասին բարձրաձայնելու ենք, իսկ եթե կլինեն մեր ժողովրդին վերաբերող ինչ-որ դրական ծրագրեր, դրանց կողմ կլինենք»,- ասաց նա։
Ու, թեև իշխող «Քաղաքացիական պայմանագիր» կուսակցությունը բոլոր հանձնաժողովներում մեծամասնություն է կազմում, սակայն դա չի կարող խոչընդոտել ընդդիմադիրներին իրենց խոսքը տեղ հասցնել։
«Մեր լծակը մեր առողջ քննադատությունն է, սուր խոսքն է, մասնագիտական հարցադրումները, որոնք ճիշտ ուղու վրա կդնեն ցանկացած հանձնաժողովի աշխատանք»,- նշեց Օհանյանը։
Նշենք, որ ԱԺ 12 մշտական հանձնաժողովներից 3-ը կնախագահեն ընդդիմադիրները, 9-ը` «Քաղաքացիական պայմանագիր» խմբակցության ներկայացուցիչները։