ԵՐԵՎԱՆ, 31 օգոստոսի - Sputnik. Հայաստանի արտգործնախարար Արարատ Միրզոյանի ու ՌԴ ԱԳ նախարար Սերգեյ Լավրովը Մոսկվայում այսօր կայացած հանդիպմանը հատուկ ուշադրություն է հատկացվել Անդրկովկասում խաղաղության հաստատման հարցին։
Այս մասին այսօր երկու նախարարների հանդիպմանը հաջորդած մամուլի ասուլիսում հայտնել է Սերգեյ Լավրովը։
«Մենք մանրամասն դիտարկեցինք ՀՀ, ՌԴ և ԱՀ ղեկավարների` նոյեմբերի 9-ին ստորագրված եռակողմ հայտարարության պայմանավորվածությունների իրականացման ընթացքը։ Այդ պայմանավորվածությունները թույլ տվեցին դադարեցնել կոնֆլիկտն ու տեղափոխել այն քաղաքական կարգավորման փուլ։ Պայմանավորվել ենք չթուլացնել Երևանին ու Բաքվին փոխադարձ գրգռող գործոնների վերացման նկատմամբ ուշադրությունը, այդ թվում` հայ գերիների ազատ արձակում, ականազերծման քարտեզների փոխանցում։ Հաստատել ենք նաև ԵԱՀԿ ՄԽ համանախագահների հետագա գործունեության անհրաժեշտությունը»,– ասել է նա։
Լավրովն իր ելույթում անդրադարձել է նաև հայ– ադրբեջանական սահմանին տիրող իրավիճակին` ընդգծելով, որ այն դուրս է ԼՂ խնդրի տարածքից։
«Ելնում ենք այն համոզումից, որ բոլոր խնդիրները հարկավոր է լուծել բացառապես քաղաքական–դիվանագիտական մեթոդներով։ Իսկ երկարաժամկետ կարգավորումը հնարավոր է միայն սահմանների դելիմիտացիայի ու դեմարկացիայի դեպքում»,– ասել է ՌԴ ԱԳ նախարարը` հավելելով, որ այս հարցում ՌԴ նախագահի նախաձեռնությունը քաջ հայտնի է։
Լավրովը հայտարարեց, որ այսօր Միրզոյանի հետ հանդիպմանը քննարկվել է այդ նախաձեռնությունն արագ իրագործելու հնարավորությունը։ Ռուսական կողմը, ԱԳ նախարարի խոսքով, հաստատել է իր պատրաստակամությունը ամեն կերպ օժանդակելու գործընթացին։