ԵՐԵՎԱՆ, 30 օգոստոսի – Sputnik. ՀՀ իշխանությունները կվերացնեն օրենսդրության բոլոր այն դրույթները, որոնք արտոնություններ են ստեղծում ներմուծվող ապրանքների համար։ Այս մասին Արդյունաբերողների և գործարարների միության անդամների հետ հանդիպելուց հետո Sputnik Արմենիայի հետ զրույցում ասաց ՀՀ էկոնոմիկայի նախարար Վահան Քերոբյանը։
«Մենք արդեն նման նախագիծ կազմել ենք, այն շրջանառության մեջ է։ Դրա գլխավոր նպատակն այն է, որ ներկրվող ապրանքները տեղականի համեմատ չհիմնավորված արտոնություններ չստանան, կամ տեղական որոշ ապրանքներ մյուսների նկատմամբ արտոնություններ չունենան», – պարզաբանեց նախարարը։
Բացի այդ, տեսչական մարմիններն ավելի ուշադիր են ստուգելու ներկրվող ապրանքների որակը, որպեսզի այդ արտադրանքը չշահի գնի մեջ ավելի ցածր որակի հաշվին։
Նշենք, որ Արդյունաբերողների և գործարարների միության ներկայացուցիչների հետ հանդիպման ժամանակ նման հարց բարձրացրեց «Անտարես» հրատարակչության տնօրեն Արմեն Մարտիրոսյանը։ Նրա խոսքով` արտերկրից ներկրվող գրքերը, ԱԱՀ–ով չեն հարկվում, իսկ տեղի հրատարակիչների ԱԱՀ գանձվում է ինչպես հումքից, այնպես էլ պատրաստի գրքերից, ինչը թանկացնում է դրանց մանրածախ վաճառքի գինը։
Ի պատասխան նախարարը նշեց, որ նույն խնդիրների բախվում են տեքստիլ արդյունաբերության աշխատողները և այլ ոլորտների մի շարք ընկերություններ։ Օրինագիծը կազմվել է նրանց աջակցելու համար։
ՀՀ էկոնոմիկայի նախարարությունը հույս ունի, որ օրենքը կընդունվի մինչև տարեվերջ։