ԵՐԵՎԱՆ, 28 օգոստոսի – Sputnik. ԵԱՏՄ–ի օրգանական արտադրանքի ճանապարհային քարտեզը կօգնի միության երկրներին ԵԱՏՄ–ի ներսում օրգանական մրգերի և բանջարեղենի ազատ վաճառք իրականացնել, իսկ ապագայում արտահանել դրանք Եվրամիություն։ Այս մասին Sputnik Արմենիայի թղթակցի հետ զրույցում ասաց ԵԱՏՀ արդյունաբերության և ագրոարդյունաբերական համալիրի հարցերով կոլեգիայի անդամ (նախարար) Արտակ Քամալյանը` մեկնաբանելով Չոլպոն–Աթայում (Ղրղզստան) տեղի ունեցած Եվրասիական միջկառավարական խորհրդում ճանապարհային քարտեզի ստորագրումը։
Ճանապարհային քարտեզը կօգնի միասնական դարձնել օրենսդրությունը օրգանական գյուղատնտեսության մեջ։ Խնդիրն արդիական է, քանի որ մինչ օրս ԵԱՏՄ երկրները չեն ճանաչում միմյանց օրգանական սերտֆիկատները. եթե հայ արտադրողը, օրինակ, ուզում է օրգանական խաղող վաճառել Ռուսաստանում կամ Ղազախստանում, նա պետք է այդ երկրներում կրկնակի սերտիֆիկատ ստանա, ինչը գործնականում դժվար է իրականացնել։ Բոլոր հինգ երկրները տարբեր պահանջներ ունեն սերտիֆիկացման համար, այդ պատճառով այժմ պետք է այդ մոտեցումները միասնական դարձնել։
Երկար և բարդ աշխատանք է սպասում, սակայն հետո ավելի բարդ խնդիր է դրվելու. հասնել արտերկրում (մասնավորապես` ԵՄ–ում) եվրասիական սերտիֆիկատների ճանաչման։
Աշխարհում օրգանական մթերքի հետ կապված երեք առանցքային «ստանդարտների ընտանիք» գոյություն ունի` ԵՄ–ում, Հյուսիսային Ամերիկայում և Արևելյան Ասիայում։ Սակայն, Քամալյանի խոսքով, դեռ պետք չէ փորձել անել անհնարինը, նախընտրելի է նպատակին փուլ առ փուլ մոտենալ։
Նշենք, որ Հայաստանում օրգանական արտադրանքի ընդհանուր ծավալը գնահատվում է մոտ 20000 հա (ներառյալ վայրի խոտաբույսերի և հատապտուղների հավաքման տարածքները)։