ԵՐԵՎԱՆ, 27 օգոստոսի – Sputnik. Սյունիքում արտառոց դեպք է տեղի ունեցել` կինը բենզին է լցրել ամուսնու վրա և հրդեհել։ Ինչպես հայտնում` Shamshyan.com-ի տեղեկություններով՝ դեպքը տեղի է ունեցել օգոստոսի 25-ին:
Ժամը 14:10-ի սահմաններում «Գորիս» բժշկական կենտրոնից ոստիկանության Գորիսի բաժին ահազանգ է ստացվել, որ «մարմնի տարբեր հատվածների 1-ին, 2-րդ և 3-րդ աստիճանի ջերմային այրվածքներ» ախտորոշմամբ իրենց մոտ բուժօգնության է տեղափոխվել մի քաղաքացի:
Հիվանդանոց մեկնած ոստիկանները պարզել են, որ վիրավորը Սյունիքի մարզի բնակիչ, 35-ամյա Անդրանիկ Ծ.-ն է: Մինչ բժիշկները բուժօգնություն էին ցուցաբերում նրան, Գորիսի ոստիկանները պարզել են, որ նույն օրը՝ ժամը 13:30-ի սահմաններում, Անդրանիկ Ծ.-ի և նրա կնոջ՝ Արևիկ Ծ.-ի միջև տեղի ունեցած տարաձայնությունների պատճառով կինը ամուսնու հետ հանդիպել է Գորիսի Արցախյան խճուղու թիվ 1 հասցեում գործող բացօթյա սրճարանում` զրուցելու նպատակով։
Այդ ժամանակ շշով բենզինը լցրել է ամուսնու կրծքավանդակին և այրել, ինչի հետևանքով էլ վերջինը վնասվածքներ է ստացել: Փաստի առթիվ ոստիկանության Գորիսի բաժնի հետաքննական բաժանմունքում նյութեր են նախապատրաստվում: