ԵՐԵՎԱՆ, 27 օգոստոսի – Sputnik. Այս պահին կորոնավիրուսով վարակված անձանցից ծանր և ծայրահեղ ծանր վիճակում գտնվում են 700 պացիենտներ։ Կառավարության այսօրվա նիստի ժամանակ հայտարարեց առողջապահության նախարար Անահիտ Ավանեսյանը։
«14 բժշկական կենտրոններում են սպասարկում կորոնավիրուսով հիվանդ պացիենտներին. 1500 մահճակալից 1143-ն արդեն զբաղված է։ Այս թվերը բավական մտահոգիչ են»,–ասաց նախարարը։
Նա հայտնեց նաև, որ երեկ իրականացվել է 7114 պատվաստում, իսկ ընդհանուր առմամբ իրականացվել է 267 504 պատվաստում։ Ավանեսյանը նշեց, որ որոշ պոլիկլինիկաներում պատվաստման համար անգամ հերթեր են գոյացել։
Նա հավելեց նաև, որ չինական պատվաստանյութի և «ԱստրաԶենեկայի» մատակարարումների հետ կապված խնդիր չկա։ Իսկ ռուսական «Սպուտնիկ V»–ի պատվաստանյութի արտադրման գործընթացի հապաղման պատճառով մատակարարման որոշակի խնդիրներ կային, սակայն հաջորդ շաբաթ նախատեսում են ստանալ պատվաստանյութի երկրորդ խմբաքանակը։
Ավանեսյանը հիշեցրեց, որ հոկտեմբերի 1-ից ուժի մեջ է մտնում բոլոր տնտեսվարողների` աշխատակիցների պարտադիր 14-օրը մեկ ՊՇՌ թեստի պատասխանների ներկայացման պահանջը։ Բացառություն են կազմելու հղիները, պատվաստվածները և բժշկական ցուցում ունեցողները։
«Մենք պատրաստ ենք ծավալելու մինչև 2600-2700 կովիդ մահճակալ»,–ասաց նախարարը։
Նշենք, որ Հայաստանում կորոնավիրուսով վարակվածների թիվը վերջին մեկ օրում ավելացել է 522–ով և դարձել 240261: