ԵՐԵՎԱՆ, 27 օգոստոսի - Sputnik. Կապան-Գորիս միջպետական Մ2 ճանապարհը բաց է: Այս մասին ֆեյսբուքյան էջում գրել է Սյունիքի փոխմարզպետ Նարեկ Բաբայանը։
ArmDaily.am-ի տեղեկություններով էլ ռուս սահմանապահները ադրբեջանցիներին երեկ չհաջողված բանակցությունները շարունակելու առաջարկ են արել։ Արդյունքում ռուս սահմանապահների ու նաև հայ սահմանապահների ջանքերի շնորհիվ համաձայնության են հասել ճանապարհը բացելու վերաբերյալ։ Ադրբեջանցիները, ըստ պարբերականի, արդեն իսկ բացում են Գորիս-Կապան ճանապարհի փակ հատվածները պայմանով, որ ճանապարհին զիգզագաձև շարված են լինելու բլոկներ: Իրենց այս որոշումն ադրբեջանցիները պատճառաբանել են իբր հնարավոր վտանգներից զգուշանալու պատճառաբանությամբ:
ՀՀ ազգային անվտանգության ծառայությունն էլ տեղեկացնում է, որ Գորիս-Կապան միջպետական ճանապարհի՝ օգոստոսի 25-ից փակված Գորիս-Որոտան և Շուռնուխ-Կարմրաքար հատվածները վերաբացվել են։
Գերատեսչությունից հայտնում են, որ Գորիս-Կապան միջպետական ճանապարհը բաց է բոլոր տեսակի տրանսպորտային միջոցների երթևեկության և քաղաքացիների ազատ տեղաշարժի համար։