ԵՐԵՎԱՆ, 27 օգոստոսի – Sputnik. Բացի արտակարգ դեպքերից, կառավարության որևէ որոշում պետք է բխի կառավարության ծրագրից։ Կառավարության այսօրվա նիստի ժամանակ հայտարարեց վարչապետ Նիկոլ Փաշինյանը։
«Պետք է նորից նայել քարոզարշավի ժամանակ քաղաքացիների հետ մեր հանդիպումների տեսանյութերը և մարդկանց բարձրացրած հարցերը ներառել կառավարության ծրագրում։ Անհրաժեշտ է խումբ ձևավորել, որը կդիտի այդ տեսանյութերը և կառանձնացնի անելիքները»,–ասաց Փաշինյանը։
Նրա խոսքով` քանի որ ԱԺ–ն արդեն իսկ հավանություն է տվել կառավարության 5-ամյա գործունեության ծրագրին, հիմա կառավարությունը պետք է կենտրոնանան միջոցառման ծրագիրը կազմելու և հաստատելու վրա։ Դրա համար օրենսդրությունը եռամսյա ժամկետ է սահմանում։
Փաշինյանն ամփոփեց իր ասելիքը` նշելով, որ պետք է ուշադրություն դարձնել կառավարության ծրագրի որակի վրա։
Նշենք, որ Հայաստանում կայացած արտահերթ խորհրդարանական ընտրությունների քարոզարշավը կայացել է հունիսի 7–19 ընկած ժամանակահատվածում։