ԵՐԵՎԱՆ, 26 օգոստոսի - Sputnik. Շաբաթ օրը Նիկոլ Փաշինյանն այցելել է ԱԳՆ, հանդիպել ղեկավար կազմի հետ և ասել, որ սկսեն ողջ ծավալով գործել՝ արդեն նախարար ունեն և շատ անելիք։ ԱԳՆ-ում ոգևորությամբ են ընդունել այս հրահանգը, որ վերջապես դուրս կգան կրավորական վիճակից։ Տեղեկությունը հայտնում է «Հրապարակ» թերթը։
Ի դեպ, ԱԺ նախկին նախագահ Արարատ Միրզոյանը շարունակելու է բնակվել Պռոշյանի կառավարական ամառանոցներում։ Նա այնտեղ էր տեղափոխվել դեռևս 2018-ին՝ որպես ԱԺ նախագահ։ Այժմ նշանակվելով արտաքին գործերի նախարար՝ նա կարող էր դուրս գալ ամառանոցից, քանզի նախկինում ԱԳ նախարարները, որպես կանոն, չեն բնակվել այստեղ։
«Ըստ օրենքի` նման իրավունք ունեն Անվտանգության խորհրդի անդամները, իսկ Միրզոյանն ԱԽ անդամ է, ուստի նա կարող է այնտեղ բնակվել։ Սակայն բանն այն է, որ ոչ բոլոր ԱԽ անդամներն են բնակվում այստեղ, այլ միայն նրանք, ում հրավիրում է անձամբ Նիկոլ Փաշինյանը»,-գրում է թերթը։
Հիշեցնենք` Արարատ Միրզոյանը ՀՀ արտաքին գործերի նախարար նշանակվեց 2021թ. օգոստոսի 19–ին։ Մինչ այդ տևական ժամանակ ԱԳՆ–ն առանց ղեկավարի ու փոխնախարարների էր մնացել։
ԱԳ նախարարի պաշտոնը գործնականում թափուր էր մայիսի վերջից, երբ Արա Այվազյանը հրաժարական տվեց։ Նրան հետևեցին նաև չորս փոխնախարարները։ Հուլիսի 14-ից Անվտանգության խորհրդի նախկին քարտուղար Արմեն Գրիգորյանը, որը նշանակվել էր արտաքին գործերի նախարարի առաջին տեղակալ, սկսեց կատարել նախարարի պարտականությունները: