Եթե Կապան-Աղավնի ավտոճանապարհը շահագործման հանձնեն, Կապանից Գորիս գնալու հարցը կլուծվի, բայց Որոտանն ու Շուռնուխը կմնան շրջափակման մեջ։ Sputnik Արմենիայի հետ զրույցում այս մասին ասաց Շուռնուխի վարչական ղեկավար Հակոբ Արշակյանը։
«Դեռ Որոտանը Խոտ գյուղով մեկ այլընտրանքային ճանապարհ ունի. կարող են վերանորոգել, այնտեղով մարդկանց տեղաշարժն ապահովել, իսկ Շուռնուխը մնում է փշալարերից կախված»,- ասաց նա։
Գորիս խոշորացված համայնքի վերջին գյուղի երթևեկելի ճանապարհահատվածի ճակատագիրն անորոշ է։ Արշակյանի խոսքով` Սյունիքի մարզպետարանից հորդորում են մտածել այլընտրանքային ճանապարհների մասի, բայց բնակիչները պատրաստ են ցանկացած զարգացման։
«Անհանգստություն կա էլի, բայց ժողովուրդը գիտի, որ իր կողքը կանգնած են իր բալեքը, իր սահմանապահ զորքը` ավելի ուժեղ, ում ձեռքին էլ զենք կա` ուշադիր, կազմ ու պատրաստ սպասում են, որ Աստված չանի` կոնֆլիկտ առաջանա, կարողանան մեկը մեկին օգնել։ Ոչինչ չի բացառվում։ Երբեք չպետք է մոռանալ, որ մեր հարևանը թուրք է»,- նշեց Արշակյանը։
Ինչպես արդեն տեղեկացրել ենք` օգոստոսի 25-ին ադրբեջանցի զինվորականները փակել են Կապան-Գորիս ավտոմայրուղու Կարմրաքար-Շուռնուխ հատվածի երթևեկությունը:
Տարածքում գտնվող տրանսպորտային միջոցները տարհանվել են։ Հայաստանի ազգային անվտանգության ծառայությունը հայտնել է, որ աշխատանքներ են տարվում ավտոմայրուղում երթևեկությունը վերականգնելու ուղղությամբ:Այսօր հակառակորդի զինվորականները փակել են Գորիս-Որոտան հատվածը։
Հենց Գորիսում իրավիճակն այժմ ընդհանուր առմամբ հանգիստ է, սակայն Քարահունջ գյուղից դեպի Որոտան, Շուռնուխ, ինչպես նաև Կապանի ճանապարհներն ամբողջությամբ փակ են։
Հետագա գործողությունների և ծրագրերի մասին ոչ ոք չգիտի, տեղի բնակիչները նույնպես որևէ տեղեկություն չունեն։ Տեղում են հայ և ռուս սահմանապահները։