ԵՐԵՎԱՆ, 26 օգոստոսի - Sputnik. Հարավկովկասյան երկաթուղին և «Տրանսմաշհոլդինգը» հուշագիր են ստորագրել ուղևորատար շարժակազմի մշակման և արտադրության վերաբերյալ։ Տեղեկությունը հայտնում է ՀԿԵ-ի մամուլի ծառայությունը։
Նշվում է, որ փաստաթուղթը ստորագրվել է «PRO//Движение.Экспо» 1520 տարածության Միջազգային երկաթուղային սալոնի շրջանակներում և կգործի հինգ տարի:
Կողմերը պայմանավորվել են համագործակցել ռազմավարական արտադրանքի տեսականու մշակման և ՀԿԵ երթուղային ցանցի պահանջարկի գնահատման առումով: Փոխգործակցության նպատակն է շարժակազմի մշակումն ու արտադրությունը, որը մաքսիմալ կհամապատասխանի տեխնիկական հագեցվածության և հարմարավետության մակարդակին և ուղևորների պահանջներին:
Կողմերը մտադիր են աշխատանքային խմբեր ձևավորել, որոնք անհրաժեշտ տեղեկատվությամբ կփոխանակվեն փոխադարձ հետաքրքրություն ներկայացնող հարցերի վերաբերյալ, համատեղ հանդիպումներ կանցկացնեն, ինչպես նաև կիրականացնեն այլ աշխատանքներ, որոնք անհրաժեշտ կլինեն համատեղ խնդիրների իրականացման համար:
ՀԿԵ ՓԲԸ-ն «Ռուսական երկաթուղիներ» ԲԲԸ-ի դուստր ընկերությունն է և իրականացնում է Հայաստանի երկաթուղային համակարգի կոնցեսիոն կառավարումը: Համաձայն 2008 թ. փետրվարի 13-ին Երևանում կնքված պայմանագրի՝ կոնցեսիոն կառավարման ժամկետը կազմում է 30 տարի՝ կողմերի փոխադարձ համաձայնությամբ ևս 10 տարի երկարացման իրավունքով: