ԵՐԵՎԱՆ, 25 օգոստոսի – Sputnik. Ազգային ժողովում ընդդիմադիր և իշխանական պատգամավորների միջև տեղի ունեցած հրմշտոցն ունենալու է իրավական և բարոյական հետևանքներ։ ԱԺ–ում լրագրողների հետ ճեպազրույցում ասաց «Հայաստան» խմբակցության պատգամավոր Վահե Հակոբյանը։
Հայտնել էինք, որ ԱԺ–ում այսօր մի քանի անգամ քաշքշուկ և իրարանցում եղավ, որոնցից մեկի ժամանակ էլ ՔՊ–ական Վահագն Ալեքսանյանը ոտքով հարվածեց Վահե Հակոբյանին։
«Այսօր մեր խմբակցությամբ նիստ կանենք և մեր հետագա տակտիկան կորոշենք, քանի որ այսպես անհնար է։ Իշխող ֆրակցիան իրեն պահում է ընդդիմադիրի պես»,–ասաց Հակոբյանը` հավելելով, որ ամեն ինչ ծրագրավորված էր իշխանության կողմից։
Նա նշեց, սակայն, պատրաստ է ամեն օր անցնել այս ամենի միջով, միայն թե վերջում մաքրեն այս մթնոլորտը։
Անդրադառնալով «Հայաստան» խմբակցության պատգամավոր Սեյրան Օհանյանի կողմից Հայկ Սարգսյանի վրա շիշ շպրտելու միջադեպին` Հակոբյանը նշեց, որ եթե ինքը լիներ գեներալի տեղը, ապա երևի նույնը կաներ։