ԵՐԵՎԱՆ, 25 օգոստոսի - Sputnik. «Սասնա ծռեր» զինված խմբի կողմից 2016-ին ՊՊԾ գնդի գրավման ժամանակ սպանված երեք ոստիկաններից մեկի` գնդապետ Արթուր Վանոյանի որդին տղա է ունեցել, նրան անվանակոչել են պապիկի անունով։
Օգոստոսի 22-ին լույս աշխարհ է եկել Արթուր Վանոյանը` Ժորա Վանոյանի և Մարիետա Հովհաննիսյանի երկրորդ երեխան։ Նրանք արդեն 4-ամյա դուստր ունեն։ Ուրախ հայրիկը իր Facebook Stories բաժնում հրապարակել է որդու ծննդյան վկայականը։
Գնդապետ Արթուր Վանոյանը այս տարի կդառնար 54 տարեկան։ Նա սպանվել է 2016-ի հուլիսի 17-ին, երբ «Սասնա ծռեր» զինված խումբը գրոհեց ՊՊԾ շենքը` պահանջելով գործող իշխանությունների (նախագահը Սերժ Սարգսյանն էր) հրաժարականը և իրենց առաջնորդ Ժիրայր Սեֆիլյանի` բանտից ազատ արձակումը։ Այդ նույն օրը երեկոյան Արթուր Վանոյանը իր կնոջ հետ պետք է գնար որդու` Ժորայի հարսանեկան առևտուրին։ Նա այդպես էլ իր որդուց երեխաներին չտեսավ։
«Սասնա ծռեր» զինված խմբի գործողությունների հետևանքով երեք ոստիկան է սպանվել` Արթուր Վանոյանը, Գագիկ Մկրտչյանը, Յուրի Տեփանոսյանը։ Խմբի անդամները կալանավորվել են, 2018-ի իշխանափոխությունից հետո նրանց զգալի մասը ազատ է արձակվել։ Արթուր Վանոյանի և Յուրի Տեփանոսյանի մահվան համար մեղադրվող Սմբատ Բարսեղյանը դատապարտվել է 25 տարվա ազատազրկման։ Գագիկ Մկրտչյանի սպանության համար մեղադրվող Արմեն Բիլյանն արդարացվել ու ազատ է արձակվել դատարանի դահլիճից, դատախազը նրա համար պահանջում էր 21 տարի։