Ռուսաստանի քաղաքացիները սկսել են ավելի հաճախ ծանրոցներ ուղարկել Հայաստան

ԵՐԵՎԱՆ, 24 օգոստոսի – Sputnik. Ռուսաստանից Վիրջինյան կղզիներ ծանրոցների և EMS առաքումների (էքսպրես-առաքում) թիվը 2021 թ․-ի առաջին կիսամյակում նախորդ տարվա նույն ժամանակահատվածի համեմատ աճել է 85 տոկոսով, Հայաստան՝ 78 տոկոսով: Տեղեկությունը հայտնում է ՌԻԱ Նովոստին՝ հղում անելով «Почта России»-ին (Ռուսաստանի փոստային ծառայություն)։

ԱՄՆ–ից եկած փոստային առաքանու միջից հայտնաբերվել է մոտ 24 գրամ «Մեթամֆետամին» թմրամիջոց

6 օգոստոսի 2021, 13:30

Ընկերությունում 2021 թ․-ի առաջին կեսին Ռուսաստանից ծանրոցների և EMS-առաքումների քանակը համեմատել են 2020 թ․-ի նույն ժամանակահատվածի հետ: Թոփ-երկրները, որտեղ աճն առավել նկատելի է, Վիրջինյան կղզիներն են (85%), Հայաստանը (78%), Հնդկաստանը (71%), Մոնտենեգրոն (61%), Ադրբեջանը (59%), Իսրայելը (48%), Ուկրաինան (47%), Մոլդովան (46%), Գերմանիան (44%), Ֆիլիպինները (44%):

Ցանկում ներառված չեն այն երկրները, որտեղ 2020 թ․-ին հազարից պակաս ծանրոց և EMS-առաքում են հասցրել:

Նշենք, որ «Почта России»-ն տարեկան ընդունում է մոտ 2,5 մլրդ նամակ ու հաշիվ և մշակում է շուրջ 365 մլն ծանրոց: Ունի 42 հազար փոստային բաժանմունք ամբողջ երկրում։ 2019 թվականի հոկտեմբերին «Почта России» դաշնային ծառայությունը վերափոխվել է նույնանուն բաժնետիրական ընկերության, որի բաժնետոմսերի 100%-ը պատկանում է Ռուսաստանին։

Ընդ որում, ԲԸ-ին են անցել այս դաշնային պետական ձեռնարկության բոլոր իրավունքներն ու պարտականությունները։