ԵՐԵՎԱՆ, 24 օգոստոսի - Sputnik․ Այն, ինչ այսօր տեղի ունեցավ Ազգային ժողովում, կատարվեց վարչապետ Նիկոլ Փաշինյանի ուղիղ հրահանգով։ Խորհրդարանում լրագրողների հետ ճեպազրույցի ժամանակ ասաց «Պատիվ ունեմ» խմբակցության ղեկավար Արթուր Վանեցյանը։
«Երբ պատգամավոր Տիգրան Աբրահամյանը հարց հնչեցրեց և ասաց, որ անթույլատրելի է նման վարքագիծը Աննա Մկրտչյանի նկատմամբ, Փաշինյանն ասաց, որ դեռ մեղմ են արձագանքել, կարծում է՝ պետք էր ավելի կոպիտ արձագանքել, և մեկ հրահանգով հարձակում սկսվեց մեր պատգամավորի նկատմամբ»,- նշեց Վանեցյանը։
Նրա բնորոշմամբ՝ կատարվածը պարզապես «խայտառակություն է», իսկ նրանք, ովքեր նման խայտառակ պահվածք դրսևորեցին, անգամ նրանց մարդ կոչելու իրավունք չունեն։
Վանեցյանի խոսքով՝ ԱԺ-ում կատարվածն արտացոլում է մեր երկրում տիրող իրավիճակը՝ մտքի, խոսքի ազատության նկատմամբ բռնություն։ Պնդում է՝ կատարվածի ամբողջ պատասխանատվությունը կրում են իշխանությունները։
Ինչ վերաբերում է Աննա Մկրտչյանի կողմից վարչապետին պարբերաբար ուղղվող «կապիտուլյանտ» բնորոշմանը, Վանեցյանը նշեց, որ կապիտուլյացիոն բնույթի փաստաթուղթ գաղտնագողի ստորագրած մարդն ուրիշ ինչ է, եթե ոչ կապիտուլյանտ։
Հիշեցնենք` ամեն ինչ սկսվեց այն բանից հետո, երբ Ալեն Սիմոնյանը պահանջեց, որպեսզի «Պատիվ ունեմ» խմբակցության անդամ Աննա Մկրտչյանը լքի ԱԺ դահլիճը։ Իսկ երբ վերջինը հրաժարվեց անել դա, անվտանգության աշխատակիցներին հրահանգեց պատգամավորին դուրս ուղեկցել։
Այս հայտարարությունից հետ ընդդիմադիր պատգամավորները մոտեցան Աննա Մկրտչյանին` փորձելով թույլ չտալ անվտանգության աշխատակիցներին դուրս հանել նրան։
Դահլիճում սկսված իրարանցումից հետո Ալեն Սիմոնյանը 20 րոպե ընդմիջում հայտարարեց։ Ընդմիջման ժամանակ պատգամավորների միջև ծեծկռտուք սկսվեց։