ԵՐԵՎԱՆ, 24 օգոստոսի - Sputnik. Խորհրդարանում ՀՀ վարչապետ Նիկոլ Փաշինյանի` կառավարության 2021-26թթ–ի գործունեության ծրագրի ներկայացման ժամանակ լրագրողները ԱԺ օթյակում բողոքի ակցիա էին իրականացնում ԱԺ-ում մտցված սահմանափակումների դեմ։
Մի քանի լրագրողների իրենց ձեռքում պաստառներ էին պահել, որոնց վրա տարբեր գրություններ կային. «Նիկոլ Փաշինյան, էլ լրագրող չես»,«Մամուլը երբեք այսքան անազատ չի եղել, քան Նիկոլի օրոք» և այլն։
Պետական պահպանության ծառայության աշխատակիցները փորձեցին խոչընդոտել ակցիան, նշելով, որ ԱԺ օթյակը ակցիա իրականացնելու տեղ չէ, բայցլրագրողներն ընդդիմացան, նշելով, որ բոլոր հնարավոր ձևերը կիրառել են իրենց բողոքի ձայնը բարձրացնելու համար, մինչդեռ ոչ մի արձագանք չեն ստացել։
«Մենք այսպես ընդամենն ասում ենք, որ մեր իրավունքները ոտնահարված են», «Խաթարված է մեր աշխատանքային պրոցեսը»,–ասում էին լրագրողները։
«Պատիվ ունեմ» դաշինքի պատգամավոր, Մարդու իրավունքների մշտական հանձնաժողովի նախագահ Թագուհի Թովմասյանը մոտեցավ նրանց և հայտարարեց, որ մտադիր է այդ թեմայով լսումներ կազմակերպել լրատվամիջոցների ներկայացուցիչների հետ:
«Մենք պետք է հասկանանք, թե ինչպես առաջ շարժվել, դիմել վարչական դատարան, թե կան այլ ուղիներ»,- ասաց նա:
Լրագրողներին Facebook-ի իր էջում աջակցել է նաև «Հայաստան» դաշինքը, մասնավորապես պատգամավոր Գեղամ Մանուկյանը, որը նաև լրագրող է։
«Լրագրողներն իրեց ոտնահարված իրավունքների համար ակցիա իրականացրեցին ԱԺ ղահլիճում»,- գրել է նա:
Հիշեցնենք, որ Աժ 8-րդ գումարման նստաշրջանը մեկնարկել է խորհրդարանում լրագրողների ազատ տեղաշարժի սահմանափակումներով։
Նրանց տեղաշարժը հսկում են Պետական պահպանության ծառայության աշխատակիցները, առաջիկայում նախատեսվում է ընդհանրապես արգելել լրագրողներին մուտք գործել խորհրդարանի շենք, լինել միջանցքներում, հարցազրույցներ իրականացնել օրենսդիրների հետ:
Նշենք, որ խորհրդարանում հավատարմագրված լրագրողները ստորագրահավաք են նախաձեռնել՝ պահանջելով չեղարկել լրագրողների տեղաշարժի հետ կապված սահմանափակումները: