ԵՐԵՎԱՆ, 23 օգոստոսի - Sputnik. «Թալիբան» շարժումը (ահաբեկչական է ճանաչվել ու արգելված է մի շարք երկրներում) համաներում է առաջարկել Աֆղանստանի նախագահ Աշրաֆ Ղանիին ու փոխնախագահ Ամրուլ Սալեհին: ՌԻԱ Նովոստիի փոխանցմամբ՝ այս մասին հայտարարել է թալիբների բարձրաստիճան առաջնորդ Հալիլ ուր Ռահման Հաքանին պակիստանյան Geo TV հեռուստաալիքի եթերում։
Թալիբները թույլ կտան նրանց երկիր վերադառնալ, «եթե նրանք ուզենան»:
«Մենք ներում ենք Աշրաֆ Ղանիին, Ամրուլա Սալեհին ու (Աֆղանստանի նախագահի անվտանգության հարցերով խորհրդական) Համդուլա Մոհիբին։ Մենք մեր կողմից ներում ենք բոլորին՝ գեներալից, որը կռվել է մեր դեմ մինչև հասարակ մարդ», - ասել է Հաքանին՝ ավելացնելով, որ թալիբների ու այդ երեքի միջև թշնամանքն առաջացել է միայն կրոական հիման վրա:
Հիշեցնենք՝ Աֆղանստանում իրավիճակը սրվել է ամերիկյան զորքերի դուրսբերման ֆոնին։ Օգոստոսի սկզբին «Թալիբանի» զինյալները լայնածավալ հարձակում էին ծավալել, գրավել խոշոր քաղաքներ, իսկ օգոստոսի 15-ին մուտք գործել Քաբուլ: Նախագահ Աշրաֆ Ղանին փախել է ԱՄԷ։ Թալիբները հայտարարում են, որ 20-ամյա պատերազմն ավարտված է, իսկ կառավարման ձևը պարզ կլինի մոտ ժամանակներս:
Այժմ շարժումը վերահսկում է Աֆղանստանի տարածքի մեծ մասը և ցամաքային բոլոր սահմանային անցումները։ Այլ երկրների քաղաքացիներին և օտարերկրյա առաքելություններում աշխատող աֆղանցիներին տարհանում են Քաբուլում միակ օդանավակայանի միջոցով, որը պահում են ԱՄՆ-ն և ՆԱՏՕ-ի երկրները: