ԵՐԵՎԱՆ, 23 օգոստոսի – Sputnik. «Իզմիրլյան» ԲԿ նախկին տնօրեն, «Հայաստան» խմբակցության պատգամավոր Արմեն Չարչյանը կալանավորվածի կարգավիճակում է առանց որևէ պատշաճ իրավական հիմքի։ Այսօր հրավիրված ասուլիսի ժամանակ այս մասին հայտարարեց փաստաբան, «Հայաստան» դաշինքի պատգամավոր Արամ Վարդևանյանը` անդրադառնալով Չարչյանի կալանքի մասին վերաքննիչ դատարանի որոշմանը։
Հայտնել էինք, որ վերաքննիչը բավարարել է Չարչյանին գրավի դիմաց ազատ արձակելու մասին որոշման դեմ` դատախազության բողոքը։
Այսպիսով, Վերաքննիչը բեկանել է առաջին Ատյանի դատարանի որոշումը և անփոփոխ թողել մինչդատական վարույթում Չարչյանի նկատմամբ ընտրված խափանման միջոց կալանավորումը։
«Կալանավորելու որոշմամբ պարզ չէ, թե ՀՀ–ում պատգամավորի անձեռնմխելիությունն ինչ իմաստ ունի այլևս։ Սակայն Չարչյանն իր կամքով այսօր կներկայանա Վարդաշեն ՔԿՀ. այնտեղ ներկա կլինեն նաև մեր խմբակցության պատգամավորները»,–ասաց Վարդևանյանը։
Իսկ «Հայաստան» դաշինքի պատգամավոր Արծվիկ Մինասյանն էլ նշեց, որ նման որոշմամբ իշխանությունն ուզում է ցույց տալ` այնքան ուժեղ են, որ ցանկացած պահի կարող են ճնշել ընդդիմադիրներին։
«Այն, ինչ նկատարվեց Չարչյանի օրինակով, ներկայիս քաղաքական իշխանության նպատակն էր, որպեսզի մեզ շեղեն Ազգային ժողովում ասելու այն, ինչի մասին մինչ այս բարձրաձայնել ենք»,–ասաց Մինասյանը։
Նշենք, որ պատասխանեցին դատախազության լրատվական բաժնից ի պատասխան Չարչյանի անձեռնմխելիությանն առնչվող հարցին, Sputnik Արմենիային պատասխանել էին, որ նրան կալանավորելու որոշում էր կայացվել մինչև նրա պատգամավոր դառնալը։
Հիշեցնենք, որ հունիսի 18-ին համացանցում հայտնվել էր ձայնագրություն, որտեղ լսվում էր, թե ինչպես է Չարչյանը աշխատակիցներին հորդորում ընտրությանը մասնակցել։ Նույն օրը Չարչյանը ձերբակալվել է։ Հունիսի 21-ին Կենտրոնական ընտրական հանձնաժողովը թույլ է տվել քրեական հետապնդում սկսել Չարչյանի նկատմամբ։ Ապա Չարչյանը կալանավորվել էր։ Չարչյանը ազատ էր արձակվել հուլիսի 21-ին՝ 15 մլն դրամ գրավի դիմաց։
Զուգահեռաբար «Իզմիրլյան» բժշկական կենտրոնի բաժնետերերը դադարեցրել են նրա գործունեությունը տնօրենի պաշտոնում: