ԵՐԵՎԱՆ, 22 օգոստոսի - Sputnik. «Թալիբան» շարժումը վերջնագիր է ներկայացրել աֆղանստանի Փանջշեր նահանգում գտնվող, այսպես կոչված, դիմադրության ջոկատներին: Թալիբները պահանջել են 4 ժամվա ընթացքում հանձնվել։ Տեղեկությունը հայտնում է «Մոսկովսկի կոմսոմոլեց» պարբերականը։
Այժմ Ահմադ Մասուդի ջոկատները, որը Փանջշերում գլխավորում է դիմադրության շարժումը, սպասում են թալիբների հարձակմանը: Միաժամանակ, տեղեկություններ կան, որ մարտական գործողությունների սկսվելուց առաջ թալիբները մտադիր են պատվիրակություն ուղարկել Մասուդի հետ բանակցելու:
Ավելի վաղ աղբյուրը հայտնել էր, որ Մասուդի և թալիբների միջև բանակցություններն արդեն ընթանում են կոալիցիոն կառավարություն ստեղծելու և քաղաքական հակասությունները հաղթահարելու շուրջ: Սակայն այդ բանակցությունների արդյունքների վերաբերյալ տեղեկություններ չկան։
Նշենք, որ Ահմադ Շահ Մասուդը տաջիկական ծագում ունեցող աֆղանական դաշտային հրամանատար է, Աֆղանստանի պաշտպանության նախարարը: Նա հայտնի է նաև «Փանջշերի առյուծ» մականունով:
Հավելենք, որ ավելի վաղ հաղորդվում էր այն մասին, որ գեներալ Աբդուլ Ռաշիդ Դուստումի գլխավորությամբ զինված կազմավորումներ են շարժվում Փանջշեր նահանգ՝ թալիբներին դիմադրություն ցույց տալու համար։ Ըստ տեղեկությունների՝ նրա հետ միասին մոտ 10 հազար մարտիկներ կան։ Ներկայում Փանջշեր նահանգը միակն է, որը թալիբների վերահսկողության տակ չէ։