ԵՐԵՎԱՆ, 22 օգոստոսի - Sputnik. Աղեստամոքսային խնդիրներից ու փորացավից խուսափելու համար արժե այս հինգ մթերքը հանել սննդակարգից, գրում է ՌԻԱ Նովոստին։
Ալկոհոլ
Բոլորը գիտեն ալկոհոլի ակնհայտ վնասների մասին: Սակայն բացի լյարդին հարվածելուց, ալկոհոլը կարող է վնասել նաև աղիները և ստամոքսը։ Որքան ուժեղ է ալկոհոլը, այնքան ավելի է այն ազդում մարսողության ամբողջ գործընթացի վրա: Այնպես որ, եթե վիսկի, կոնյակ կամ օղի եք սիրում, գոնե գարեջրի ու գինու անցեք։
Միս
Մսի հատկապես երկու տեսակները` վերամշակված միսը (երշիկեղեն) և խորովածը բացասական են ազդում մարդու աղիների վրա։ Երշիկեղենում պարունակվում են վտանգավոր նյութեր` նիտրոզամիններ, որոնք կարող են անգամ աղիքների քաղցկեղ առաջացնել: Իսկ խոզի կամ գառան յուղոտ խորովածը հատկապես դժվար է մարսվում, ինչը լրացուցիչ լարվածություն է առաջացնում աղիների համար:
Իսկ եթե շաբաթական երկու անգամից ավելի տապակած միս ուտեք, այն կարող է սարսափելի հետևանքներ ունենալ։ Լորձաթաղանթը կարող է բորբոքվել և ուռուցքի տեղիք տալ։
Քաղցրեղեն
Տորթերը և թխվածքները միայն մեր կազմվածքին չէ, որ վնասում են։ Շաքարի ավելորդ օգտագործումը բացասաբար է ազդում աղիների վրա: Ներքին միկրոֆլորան ոչնչանում է, և դա հանգեցնում է պաթոգեն բակտերիաների բազմացման, որոնք կարող են մարսողական տրակտից ներթափանցել այլ օրգաններ, ինչը կարող է նույնիսկ Ալցհեյմերի և Պարկինսոնի պատճառ դառնալ:
Մայոնեզ
Մայոնեզը առհասարակ շատ վնասակար է աղեստամոքսային տրակտի համար: Այն տհաճ ազդեցություն է թողնում միկրոֆլորայի վրա: Սակայն, եթե տնական մայոնեզ կարողանաք ձեռք բերել, որը ստեղծվել է առանց լրացուցիչ քիմիական բաղադրիչների, այն ձեր ստամոքսին չի վնասի։
Մարգարին
Մարգարինում պարունակվող լինոլեաթթուն բացասաբար է անդրադառնում մեր օրգանիզմի վրա: Երբեք չի կարելի չափից շատ մարգարին ուտել։
Փոխարենը պահեք հավասարակշռված դիետա, խմեք շատ ջուր և մի մոռացեք մարզվելու մասին։