ԵՐԵՎԱՆ, 21 օգոստոսի - Sputnik. Սոցիալական ցանցերում, ինչպես նաև որոշ լրատվամիջոցներով տարածվում է ՀՀ ՊՆ N զորամասի պահպանության տարածքում իրականացվող ինժեներական աշխատանքները պատկերող տեսանյութ, որում, տեսանյութը նկարահանողը պնդում է, թե իբր զինվորներն են գումար հավաքել և շինարարական տեխնիկա վարձել՝ այդ աշխատանքներն իրականացնելու համար։ Այս մասին տեղեկացնում են ՀՀ պաշտպանության նախարարությունից։
Գերատեսչությունից հայտնում են, որ նշված տեսանյութը նկարահանվել է ընթացիկ տարվա հուլիս ամսին։ Տեսանյութի փաստով նշանակվել է ծառայողական քննություն, ՀՀ ՔԿ ԶՔԳՎ 8-րդ կայազորային քննչական բաժնում նախապատրաստվում են նյութեր։
Տեսանյութում արվող պնդումը՝ զինվորների գումար հավաքելու մասին, չի համապատասխանում իրականությանը, իսկ պնդում անող զինծառայողը ենթարկվել է կարգապահական տույժի։
Պաշտպանության նախարարությունը կոչ է անում քաղաքացիներին և ԶԼՄ ներկայացուցիչներին ձեռնպահ մնալ զինված ուժերի մասին չճշտված, առավել ևս՝ կեղծ տեղեկատվություն տարածելուց և, կամա թե ակամա, չվնասել բանակի հեղինակությանը։
Ավելի վաղ ԶԼՄ-ներում տեսանյութ էր տարածվել, որտեղ ցուցադրվում են կադրեր, թե ինչպես է էքսկավատորը հող փորում։ Ուղեկցող ձայնը նշում է, որ զինվորներն են փողը տվել, որպեսզի հրանոթի համար փոս փորվի։