ԵՐԵՎԱՆ, 20 օգոստոսի – Sputnik. «Թալիբան» արմատական շարժման (Ռուսաստանում արգելված ահաբեկչական խմբավորում) գրոհայինները ծեծի են ենթարկել ամերիկացի լրագրող Մարկուս Յամին (Marcus Yam)։ Լրագրողն այդ մասին գրել է Los Angeles Times–ի իր հոդվածում` հավելելով, որ ծեծից հետո թալիբներն իրենից ներողություն են խնդրել։
Լրագրողի խոսքով` միջադեպը տեղի է ունեցել, երբ ինքն ու գործընկերը նկարահանում էին թալիբների և նախկին կառավարության համախոհների բախումը։ Այդ պահին իր և մյուս լրագրողի վրա հանկարծակի հարձակվել են զինյալները։
«Շատ վախեցա։ Ես բարձրացրի ձեռքս և ասացի նրանց, որ մեզ ձեռք չտան, որ մենք օտարերկրյա լրագրողներ ենք», – պատմել է Յամը։
Դրանից հետո հարձակվողները ներողություն են խնդրել լրագրողներից, ինչպես նաև նրանց սառը ջուր և էներգետիկ ըմպելիք հյուրասիրել։ Ամերիկացին խոստովանել է, որ թալիբների պահվածք նրան շատ է զարմացել։
Ավել վաղ հայտնել էին, որ «Թալիբանի» գրոհայինները ծեծի են ենթարկել Ariana News աֆղանական հեռուստաալիքի և Pajhwok գործակալության լրագրողներին, երբ նրանք փորձել էին ռեպորտաժ նկարահանել ազգային դրոշի աջակցությանն ուղղված ցույցերի մասին։
Մինչ այդ Աֆղանստանի լրագրողների պաշտպանության կոմիտեն հայտարարել էր, որ տեղական ԶԼՄ–ների աշխատակիցների կյանքը վտանգված է։ Կոմիտեի ներկայացուցիչները մտահոգություն էին հայտնել լրագրողների անվտանգության վերաբերյալ և դիմել ԱՄՆ–ին` կոչ անելով ապահովել նրանց անվտանգությունը։