Նիկոլ Փաշինյանի ասածը լրիվ հնարավոր է, եթե տնտեսության զարգացման գործում ջանքեր ներդրվեն, որպեսզի յուրաքանչյուր տարի ոչ թե 7-8 հազար մարդ տեղավորվի աշխատանքի, այլ 10 հազար հոգի։ Sputnik Արմենիայի հետ զրույցում նման կարծիք հայտնեց տնտեսագետ Գագիկ Մակարյանը։
«Այդ դեպքում նախանշված ժամկետում 50 հազար հոգի կունենա աշխատանք, հետևաբար գործազրկությունն էլ կիջնի մինչև 10 տոկոս և նույնիսկ այդ նշաձողից մի փոքր էլ ներքև»,– ասաց նա։
Օգոստոսի 18-ին կառավարության նիստում վարչապետ Նիկոլ Փաշինյանը ներկայացրեց 2021-26 թվականների ծրագիրը, որում որպես սոցիալական ապահովության ոլորտի թիրախ` Հայաստանում ընտրվել է 10 տոկոսից ցածր գործազրկության մակարդակի ապահովումը։
Մակարյանի խոսքով` հիմա պաշտոնական գործազրկությունը հաշվարկվում է այն թվով, որով մարդիկ որպես գործազուրկ գրանցված են աշխատանքի տեղավորման պետական գործակալություններում։ Խոսքը մոտավորապես 90 հազար մարդու մասին է, որոնք արդեն գրանցված են և աշխատանք են որոնում, ուստի նշված համատեքստում գործազրկության ցուցանիշը կազմում է 17,8 տոկոս։
«Եթե ասվում է, որ այդ ցուցանիշը պետք է դառնա 10 տոկոս կամ դրանից պակաս, նշանակում է` 90 հազար գործազուրկների կեսը պետք է տեղավորվի աշխատանքի, այսինքն` մինչև 2026 թվականը տարեկան 45-50 հազար մարդ»,– նշեց Հայաստանի գործատուների հանրապետական միության նախագահը։
Մակարյանի խոսքով` նշված թվերով էլ, դրանից մի քիչ պակաս ընթանում է գործազրկության նվազումը։ Ըստ նրա` պետական գործակալությունը իրականում կարողանում է տարեկան մոտավորապես 7-10 հազար մարդու տեղավորել աշխատանքի։
Տնտեսագետը տվյալ գործընթացում ակնկալում է ավելի մեծ արագություն, որովհետև վարչապետի նշած ցուցանիշին կարելի է հասնել ավելի շուտ, եթե ստեղծվեն արդյունաբերական կենտրոններ, ԵՄ–ի հատկացված գումարներով հիմնվեն արտասահմանյան ընկերությունների ձեռնարկություններ։
Ըստ նրա` յուրաքանչյուր մարզում 10–ական գործարան տեղակայելու դեպքում կունենանք մուլտիպլիկատիվ էֆեկտ, և աշխատատեղերի քանակը կրկնակի կավելանա, աշխատատեղեր կբացեն նաև հարակից գործընկերները կամ նրանց սպասարկող ընկերությունները։
Մակարյանը համոզված է` ճիշտ մոդելներ կիրառելու դեպքում վարչապետի նախանշած ցուցանիշին կարելի է հասնել ոչ թե հինգ, այլ 2,5 տարում։