Պաշտոնական Երևանը պետք է փորձի հասկանալ, թե ինչ կապեր ունի «Թալիբանը» արցախյան պատերազմում ներգրավված պետությունների հետ, պետք է բացատրի, թե ինչ էր անում հայկական խաղաղապահ անձնակազմը Քանդահարում, թալիբներին ազդակներ հղի առ այն, որ Երևանը կողմ է Աֆղանստանում ներքին համերաշխության մթնոլորտի ձևավորմանը, Sputnik Արմենիայի հետ զրույցում նման տեսակետ հայտնեց փորձագետ Գրիգոր Բալասանյանը։
«Աֆղանական թնջուկը լուրջ ազդակ է` ուղղված այդ երկրում այն ուժերին ու անհատներին, որոնք հույսեր են կապել Միացյալ Նահանգների հետ, բայց այսօր կանգնել են կոտրած տաշտակի առջև, նախագահը փախել է երկրից, բանակային հրամանատարիներից մեկը հատել է Իրանի, մյուսը՝ Ուզբեկստանի սահմանը, այսինքն` իրականում այստեղ գործ ունենք քաոսի հետ, որը սկսվեց այդ երկրից ԱՄՆ–ի զինուժի դուրս գալուց հետո»,– նշեց փորձագետը։
Բալասանյանի դիտարկմամբ` «Թալիբան» շարժումը ստեղծվել է ԱՄՆ–ի գիտությամբ և անմիջական մասնակցությամբ, որի հիմնական նպատակը պայքարն էր խորհրդային բանակի դեմ, բայց մեր օրերում այդ շարժումն օգտագործվում է նաև Իրանում իրավիճակն ապակայունացնելու համար։ Իրանին, սակայն, հաջողվեց փրկվել այդ սցենարից, և հիմա երկկողմ երկկողմ հանդիպումներ կլինեն «Թալիբանի» առաջնորդների հետ։
Ըստ փորձագետի` աֆղանական դեպքերը ցույց տվեցին, որ գործ ունենք երկակի ստանդարտների հետ, այսինքն` մի կողմից «Թալիբանը» հռչակվում է միջազգային ահաբեկչական կառույց, մյուս կողմից նրա ներկայացուցիչների հետ տարիներ շարունակ գերտերությունները բանակցություններ են վարում։
Հիշեցնենք, որ Աֆղանստանում իրավիճակը հատկապես սրվեց վերջին շաբաթների ընթացքում, երբ թալիբները հարձակվեցին խոշոր քաղաքների վրա («Թալիբան» շարժումը ՌԴ–ում ահաբեկչական խմբավորում է ճանաչվել և արգելված է)։ Կիրակի օրը ԶԼՄ–ները հայտնեցին, որ թալիբները վերահսկում են բոլոր սահմանային անցակետերը։ Նույն օրն ավելի ուշ գրոհայինները հայտարարեցին, որ մտել են Քաբուլ և վերահսկողության տակ առել նախագահի նստավայրը։ Աֆղանստանի նախագահ Աշրաֆ Ղանին իր հերթին հայտարարեց, որ լքել է երկիրը` «արյունահեղությունը կանխելու համար»։ Կիրակի լույս երկուշաբթի գիշերը «Թալիբանի» քաղաքական գրասենյակի պաշտոնական ներկայացուցիչ Մուհամեդ Նաիմն ասաց, որ Աֆղանստանում պատերազմն ավարտվել է։