ԵՐԵՎԱՆ, 17 օգոստոսի – Sputnik. Թալիբանին, պարզվում է ևս խորթ չեն մարդկային թուլությունները։ Թալիբները նույնպես կարող են զվարճանալ երեխայի պես՝ կարուսել նստել, ատրակցիոններում ավտոմեքենա վարել ու նույնիսկ երեխայի պես ցատկոտել ու ուրախանալ:
Ոմանք էլ գերադասում են իրենց հաղթանակը նշել Քաբուլի մարզասրահում, որտեղ մարզվելու հնարավորություն, դատելով տարածված տեսանյութից, երբևէ չեն ունեցել։
Իրենք գրավել են Աֆղանստանը ու հիմա կարող են նաև իրենց թույլ տալ փոքրիկ հիմարություններ անել։
Համացանցում տեսանյութեր են տարածվել այն մասին, թե ինչպես են իրենց հաղթանակը նշում ահաբեկչական կազմակերպության անդամ զինյալները։
Հիշեցնենք, որ Աֆղանստանում իրավիճակը հատկապես սրվեց վերջին շաբաթների ընթացքում, երբ թալիբները հարձակվեցին խոշոր քաղաքների վրա («Թալիբան» շարժումը ՌԴ–ում ահաբեկչական խմբավորում է ճանաչվել և արգելված է)։ Կիրակի օրը ԶԼՄ–ները հայտնեցին, որ թալիբները վերահսկում են բոլոր սահմանային անցակետերը։
Նույն օրն ավելի ուշ գրոհայինները հայտարարեցին, որ մտել են Քաբուլ և վերահսկողության տակ առել նախագահի նստավայրը։ Աֆղանստանի նախագահ Աշրաֆ Ղանին իր հերթին հայտարարեց, որ երկիրը լքել է արյունահեղությունը կանխելու համար։ Կիրակի լույս երկուշաբթի գիշերը «Թալիբանի» քաղաքական գրասենյակի պաշտոնական ներկայացուցիչ Մուհամմեդ Նաիմն էլ հայտարարեց, որ Աֆղանստանում պատերազմն ավարտվել է։