ԵՐԵՎԱՆ, 17 օգոստոսի – Sputnik. Խորհրդարանական մեծամասնությունն ընդունեց սահմանային իրավիճակը քննարկելու առաջարկը։ Այսօր ԱԺ արտահերթ նիստում այդ մասին հայտարարեց ՀՀ ԱԺ նախագահ Ալեն Սիմոնյանը։
«Առաջարկն ընդունվել է, կա պայմանավորվածություն, մենք ժամանակացույցը կհասկանանք։ Ամենայն հավանականությամբ վաղը ձեր ասած քննարկումը տեղի կունենա»,– ասաց Սիմոնյանը` հավելելով, որ այսօրվա արտահերթ նիստին զուգահեռ տեխնիկապես հնարավոր չէր մեկ այլ քննարկում ևս իրականացնել։
Թե ինչ ընթացակարգով կանցկացվի քննարկումը, կլինի բաց, թե փակ, ԱԺ նախագահը չհստակեցրեց։
Հիշեցնենք` այսօր ԱԺ արտահերթ նիստի մեկնարկին «Հայաստան» խմբակցությունն առաջարկեց քննարկել ՀՀ–ի շուրջն ու սահմանային տարածքներում ստեղծված լարվածության հարցը։
Առաջարկը խորհրդարանի արտահերթ նիստում հնչեցրեց «Հայաստան» խմբակցության անդամ Սեյրան Օհանյանը։
«Քանի որ այսօր երկու ընթերցումների արանքում ժամանակ ունենք, «Հայաստան» դաշինքն առաջարկում է փակ, գաղտնի, բաց, ինչպես դուք կորոշեք, քննարկում կազմակերպել, համապատասխան պատասխանատու անձանց կողմից` հաշվի առնելով այն, որ իրարամերժ տեղեկություններ են գալիս սահմանից։ Քննարկենք իրավիճակը, իմանանք իրականությունն ու մեր հասարակության մտահոգությունները փարատենք»,– ասաց Օհանյանը։
Նիստը վարող ԱԺ նախագահ Ալեն Սիմոնյանը խոստացավ նիստի ընդմիջմանը քննարկել Սեյրան Օհանյանի առաջարկը։
Հիշեցնենք` ադրբեջանցի զինվորականները մայիսի 12-ից Հայաստանի Սյունիքի մարզում գտնվող Սև լճի տարածքում են և փորձում են ամրապնդվել այնտեղ։ Նմանատիպ իրավիճակ է նաև Գեղարքունիքի մարզի Կութ, Վերին Շորժա և Նորաբակ գյուղերի հատվածում։
Ռուսական կողմի միջնորդությամբ բանակցությունների մի քանի փուլ է կայացել։ Հակառակորդն առայժմ հեռանալու մտադրություն դեռ չունի։
ՀՀ ռազմաքաղաքական ղեկավարությունը հայտարարում է, որ ցանկանում է խնդիրը լուծել խաղաղ ճանապարհով, բայց չի բացառում նաև ուժի կիրառման տարբերակը, եթե բանակցություններն արդյունք չտան։