ԵՐԵՎԱՆ, 16 օգոստոսի – Sputnik. «Թալիբան» * շարժման կողմից երկրում իշխանությունը բռնազավթելուց հետո մարդիկ Աֆղանստանը լքելու վերջին փորձերն են անում։
Սոցցանցերում կադրեր են տարածվում, որոնցում երևում է` ինչպես են մարդիկ ամեն գնով օդանավակայանում փորձում ինքնաթիռ նստել։
Նրանք «գրոհում» են օդանավասանդուղքը` օդանավ բարձրանալու համար։ Աֆղանստանից մեկնելու այլ ճանապարհ չկա, քանի որ սահմանային բոլոր անցակետերը թալիբների վերահսկողության տակ են գտնվում։
Քաբուլի օդանավակայանը ՆԱՏՕ–ի ուժերի կողմից վերահսկվող միակ տեղն է մնացել։
Սոցցանցերում կադրեր են հայտնվել, որտեղ երևում են Քաբուլի օդանավակայանում մահացած մարդկանց մարմինները։ Տեղացի լրագրողները հայտնում են, որ այդ մարդիկ հնարավոր է` հրմշտոցի ժամանակ են մահացել։
Գիշերը կրակոցներ են հնչել։ Ամերիկյան կողմը հայտարարում է, որ իրենց զինվորականներն օդ են կրակել կարգուկանոն հաստատելու համար։
Աֆղանստանում իրավիճակը հատկապես սրվեց վերջին շաբաթների ընթացքում, երբ թալիբները հարձակվեցին խոշոր քաղաքների վրա։ Կիրակի օրը ԶԼՄ–ներն հայտնեցին, որ թալիբները վերահսկում են բոլոր սահմանային անցակետերը։
Ավելի ուշ գրոհայինները հայտարարել էին, որ բանակցում են կառավարության հետ` խաղաղ կերպով Քաբուլ մտնելու համար և որ Աֆղանստանի կառավարությունն է պատասխանատվություն կրելու Քաբուլի անվտանգության համար մինչև անցումային գործընթացի ավարտը։ Ավելի վաղ հայտնել էին նաև, որ Աֆղանստանի նախագահ Աշրաֆ Ղանին լքել է երկիրը։
*«Թալիբանը» ՌԴ–ում և մի շարք այլ երկրներում արգելված ահաբեկչական կազմակերպություն է։