ԵՐԵՎԱՆ, 16 օգոստոսի – Sputnik. Պատերազմի հետևանքները դեռևս ամբողջովին չեն հաղթահարվել` Հայաստանն ու Արցախը բախվում են անվտանգային խնդիրների։ Ուրուգվայի արտգործնախարար Ֆրանսիսկո Բուստիժոյի հետ համատեղ մամուլի ասուլիսի ժամանակ հայտարարեց ՀՀ արտգործնախարարի պարտականությունները կատարող Արմեն Գրիգորյանը։
«Հայաստանը գնահատում է Արցախի դեմ ագրեսիայի առնչությամբ Ուրուգվայի սկզբունքային դիրքորոշումը։ Ի թիվս այլոց, Ուրուգվայի օրենսդիր մարմինը դատապարտել է Ղարաբաղյան հակամարտությունում Թուրքիայի վարձկանների ներգրավվումը և Ադրբեջանի կողմից մարդու իրավունքների խախտման, քաղաքացիական ենթակառուցվածքների ռմբակոծման դեպքերը»,–ասաց Գրիգորյանը։
Նրա խոսքով` պատերազմից հետո, սակայն, դեռևս չեն հայրենադարձվել հայ ռազմագերիներն ու քաղաքացիական պատանդները։ Այս պարագայում, ըստ Գրիգորյանի, Հայաստանը շարունակում է ապավինել իր բարեկամ երկրների և Ուրուգվայի համերաշխությանը։
Նա հավելեց նաև, որ հայ-ուրուգվայական հարաբերությունները դինամիկ զարգանում են։ Գրիգորյանը նշեց, որ Բուստիժոն մի շարք հանդիպումներ է ունենալու իր այցի շրջանակներում, որոնց ժամանակ կքննարկվեն տնտեսական փոխգործակցության հարցեր։
Գրիգորյանը հայտնեց նաև, որ հաջորդ տարի Հայաստանն ու Ուրուգվայը նշելու են դիվանագիտական հարաբերությունների հաստատման 30-ամյակը։