ԵՐԵՎԱՆ, 16 օգոստոսի - Sputnik. Բարձրագույն դատական խորհուրդը մերժել է Երևանի առաջին ատյանի ընդհանուր իրավասության դատարանի դատավոր Դավիթ Գրիգորյանին պատասխանատվության ենթարկելու վերաբերյալ արդարադատության նախարարի տեղակալ Քրիստինե Գրիգորյանի միջնորդությունը: Այս մասին Sputnik Արմենիային տեղեկացրեցին ԲԴԽ լրատվական ծառայությունից։
Որոշումն ուժի մեջ է մտնում հրապարակման պահից և վերջնական է:
ՀՀ արդարադատության նախարարության կողմից Երևանի ընդհանուր իրավասության դատարանի դատավոր Դավիթ Գրիգորյանի նկատմամբ կարգապահական վարույթ էր հարուցվել՝ լրատվամիջոցներից մեկին տված հարցազրույցի ընթացքում, ՀՀ քրեական օրենսգրքի 300.1-րդ հոդվածի մեղադրանքով գործով վարույթը կարճելու մասին որոշման վերաբերյալ կարծիք արտահայտելու համար։
Հիշեցնենք, որ Դավիթ Գրիգորյանի որոշմամբ՝ 2019թ. մայիսի 18-ին ՀՀ երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորումը փոխվեց ու նա անձնական երաշխավորությամբ ազատ արձակվեց։