ԵՐԵՎԱՆ, 15 օգոստոսի – Sputnik. Լոռիում երեկ երեկոյան ձորը գլորված «Ֆորդ» մակնիշի ավտոմեքենայում երեք անձ է գտնվել, որոնցից երկուսը մահացել են, իսկ մեկն իր ուժերով կարողացել է դուրս գալ մեքենայից։ Տեղեկությունը հայտնում է ՀՀ քննչական կոմիտեն` մանրամասներ հայտնելով ողբերգական դեպքից։
Հայտնել էինք, որ ոստիկանները երեկ երեկոյան նկատել են փայտով բեռնված մի մեքենա և փորձել են կանգնեցնել այն, որպեսզի ստուգեն։ Սակայն վարորդը սկսել է ավելի արագ վարել մեքենան, ինչի հետևանքով դուրս է եկել ճանապարհից ու Լորուտ-Մարց հատվածում ձորը գլորվել. 2 անձ մահացել է։ Դրանից հետո դեպքի վայրում անհայտ անձինք ոստիկաններին են ծեծել` նրանց մեղադրելով կատարվածում։
«Երբ մեքենան գլորվել է ձորը, այդ ընթացքում դեպքի վայրին են մոտեցել հարակից գյուղերի բնակիչներ և մեկ այլ՝ «Զիլ» մակնիշի ավտոմեքենա. հավաքվածները, քաշքշելով և հայհոյելով, հարվածներ են հասցրել ծառայություն իրականացնող ոստիկաններին՝ կատարվածի մեջ մեղադրելով վերջիններիս։ Բացի այդ, կողաշրջել և ձորն են գցել ոստիկանության «ՈւԱԶ» մակնիշի ավտոմեքենան»,–նշված է ՔԿ-ի հաղորդագրության մեջ։
Ոստիկանները կապի միջոցով օգնության են կանչել հարակից տարածքում ծառայություն իրականացնող ոստիկանության Թումանյանի բաժնի ՊՊԾ դասակի ծառայողներին: Վերջիններս «Վազ 2106» մակնիշի մեքենայով շտապել են դեպքի վայր, սակայն ճանապարհին ավտոմեքենան խափանվել է, ինչի պատճառով դեպքի վայր են հասել այլ ավտոմեքենայով։ Երբ վերադարձել են «Վազ 2106» մակնիշի ավտոմեքենայի մոտ, այն հայտնաբերել են հրկիզված վիճակում:
Պարզվել է «Ֆորդ» ավտոմեքենայի սրահում գտնված, վթարի հետևանքով ստացած վնասվածքներից տեղում մահացած անձանցից երկուսի ինքնությունը, որոնցից մեկը Լոռու մարզի Թումանյան համայնքի Մարց գյուղի բնակիչ է, մյուսը՝ Վանաձոր քաղաքի, իսկ երրորդ անձի ինքնությունը դեռևս պարզված չէ: Պարզվել են միջադեպին մասնակից անձանցից չորսի ինքնությունը. վերջիններս ձերբակալվել են և հարցաքննվել։
Դեպքի առթիվ հարուցվել է քրեական գործ՝ քրեական օրենսգրքի 316-րդ հոդվածի 1-ին մասով (իշխանության ներկայացուցչի նկատմամբ բռնություն գործադրելը), 185-րդ հոդվածի 2-րդ մասի 1-ին և 3-րդ կետերով (գույքը դիտավորությամբ ոչնչացնելը կամ վնասելը), 258-րդ հոդվածի 2-րդ մասով (խուլիգանությունը) և 242-րդ հոդվածի 3-րդ մասով (ճանապարհային երթևեկության և տրանսպորտային միջոցների շահագործման կանոնները խախտելը)։