ԵՐԵՎԱՆ, 15 օգոստոսի – Sputnik. Կարմիր խաչի միջազգային կոմիտեի աջակցությամբ 5 տոննա տարողությամբ բաքեր են տեղադրվում Ստեփանակերտի ջրազուրկ բնակելի շենքերի բակերում։ Տեղեկանում ենք Ստեփանակերտի քաղաքապետարանի ֆեյսբուքյան էջում արված գրառումներից։
Օգոստոսի 11-ին հայտնի դարձավ, որ երաշտի պատճառով Ստեփանակերտում առաջացած ջրամատակարարման խնդիրների վերացման նպատակով քաղաքապետ Դավիթ Սարգսյանը որոշել է դադարեցնել քաղաքում գործող ավտոլվացման կետերի և հանգստի գոտիների ջրօգտագործումը։
«Ստեփանակերտի ջրազուրկ թաղամասերի բնակիչներին խմելու ջրով ապահովելու գործին իր նպաստն է բերում նաև Լեռնային Ղարաբաղում Կարմիր խաչի միջազգային կոմիտեի առաքելությունը: Մասնավորապես, վերջինիս աջակցությամբ 3-5 տոննա տարողությամբ բաքեր են տեղադրվում ջրազուրկ բնակելի շենքերի բակերում»,–նշված է գրառման մեջ։
Քաղաքապետարանի ներկայացուցիչները շրջայցեր են կատարել և համոզվել, որ քաղաքի ավտոլվացման կետերը չեն աշխատում:
Հիշեցնենք, որ ջրամատակարարման խնդիրների վերացման նպատակով քաղաքապետ Դավիթ Սարգսյանը որոշել է դադարեցնել Ստեփանակերտում գործող ավտոլվացման կետերի և հանգստի գոտիների ջրօգտագործումը։