ԵՐԵՎԱՆ, 13 օգոստոսի – Sputnik. Արցախի դատախազությունը սկսել է պատերազմի հետևանքով վնաս կրած ֆիզիկական և իրավաբանական անձանց պետական աջակցության գործընթացի օրինականության ուսումնասիրություն։ Տեղեկանում ենք Արցախի դատախազության պաշտոնական կայքից։
«Արցախի գլխավոր դատախազի կողմից Արցախի տարբեր համայնքներ կատարված այցելությունների և բնակիչների հետ հանդիպումների ընթացքում վերջիններիս կողմից բանավոր բարձրաձայնվել են պետական աջակցության ծրագրի, դրանից օգտվելու համար տեղեկությունների հավաքագրման հետ կապված մի շարք խնդիրներ։ Դրանք առերևույթ վկայել կամ կարող են վկայել կոռուպցիոն դեպքերի առկայության, պաշտոնեական դիրքի չարաշահման կամ նմանատիպ այլ երևույթների մասին»,–նշվածէ հաղորդագորթւյան մեջ։
Նշված ոլորտում հնարավոր ապօրինի երևույթները վերհանելու, կանխարգելելու կամ բացառելու նպատակով Արցախի գլխավոր դատախազությունը և շրջանային դատախազությունները սկսել են ուսումնասիրություններ, որոնց արդյունքների մասին կիրազեկվի լրացուցիչ:
Հիշեցնենք, որ Արցախի կառավարության հունիսի 3-ի N 579-ն որոշմամբ հաստատվել էր 2020 թվականի սեպտեմբերի 27-ից Արցախի դեմ սանձազերծված պատերազմական գործողությունների հետևանքով նյութական վնաս կրած ֆիզիկական և իրավաբանական անձանց պետական ֆինանսական աջակցության միջոցառման իրականացման կարգը։