ԵՐԵՎԱՆ, 12 օգոստոսի – Sputnik. Մինչև կառավարական ամառանոցներին հասնելը ՀՀ–ում այլ անշարժ գույք կգտնվի։ Այսօր ԱԺ–ում հայտարարեց ՔՊ–ի կողմից ԱԺ աշխատանքի և սոցիալական հարցերի և առողջապահության հարցերի մշտական հանձնաժողովի նախագահի պաշտոնում առաջադրված Հերիքնազ Տիգրանյանը` պատասխանելով «Հայաստան» խմբակցության անդամ Արծվիկ Մինասյանի հարցին, թե ինչպես է վերաբերվում կառավարական ամառանոցները զինվորի վերականգնողական կենտրոնի վերածելու` ընդդիմության նախընտրական գաղափարին։
«Ես կարծում եմ, որ մինչև հասնելը կառավարական ամառանոցներին, ՀՀ–ում կգտնվի շատ այլ անշարժ գույք, որը կարող է ծառայեցվել այդ նպատակին։ Ուղղակի կառավարական ամառանոցներն անընդհատ վկայակոչելը ես համարում եմ, կներեք, ամբոխահաճություն»,– ասաց Տիգրանյանը։
Արծվիկ Մինասյանը շեշտեց, որ խոսքը պետական սեփականություն հանդիսացող գույքի արդյունավետ օգտագործման մասին է։
ԱԺ նիստը վարող ԱԺ փոխնախագահ Ռուբեն Ռուբինյանն էլ հիշեցրեց, որ մինչ 2018թ–ի հեղափոխությունը, երբ ՀՅԴ ներկայացուցիչները կոալիցիոն կառավարության անդամ էին, կառավարական ամառանոցներից մեկը գործադրի որոշմամբ նվիրվեց ՀՀ երրորդ նախագահ Սերժ Սարգսյանին։
Հեղափոխությունից հետո այդ որոշումը չեղարկվեց, իսկ Սերժ Սարգսյանի զբաղեցրած առանձնատունը փոխանցվեց ՀՀ վարչապետ դարձած Նիկոլ Փաշինյանին։