Ադրբեջանական կողմն առանձնապես չի թաքցնում իր նպատակները, որոնք միտված են սահմանների ճշգրտմանը, խաղաղության պայմանագիր կնքելուն և Զանգեզուրի միջանցքի գործարկմանը, և քանի որ այս պահին Ադրբեջանը չի կարող գնալ լայնամասշտաբ կոնֆլիկտի, հետևաբար փորձում է լոկալ միջադեպեր հրահրել, որոնց քանակն Արցախում գնալով կարող է աճել, Sputnik Արմենիայի հետ զրույցում ասաց Դավիթ Հարությունովը։
«Սա շարունակությունն է այն գործընթացի, որը տեղի է ունենում վերջին ամիսներին։ Կարող է թվալ, թե նորություն է ակտիվացումն արցախյան ուղղությամբ, սակայն գործնականում նույն պրոցեսն է։ Եթե հիմնվենք կողմերի պաշտոնական հայտարարությունների վրա, ապա խնդիրն այն է, որ իրար հակասող բաներ են ասում։ Ադրբեջանի համար խաղաղ պայմանագրի նպատակն այն է, որ Հայաստանը հաստատի Արցախի վերաբերյալ ցանկացած դիրքորոշում կամ հավակնություն չունենալու հանգամանքը, իսկ հայկական կողմը պնդում է, որ Մինսկի խմբի շրջանակներում բանակցությունները վերսկսվեն, քանի որ հիմնախնդիրը չի կարգավորվել»,– ասաց փորձագետը։
Հարությունովի կարծիքով` եթե կողմերն իրատեսական զիջումների չգնան, ոչինչ չի ստացվի։ Ըստ նրա` Հայաստանի համար խաղաղությունն ինքնանպատակ չէ, բայց Ադրբեջանն իր հերթին ձգտում է ստեղծել տարածաշրջանային կապերի այնպիսի համակարգ, որում Հայաստանը կլինի կախյալ վիճակում`թույլ, կրտսեր գործընկերոջ կարգավիճակով, ուստի Ադրբեջանին հունից հանում է այն հանգամանքը, որ Հայաստանը չի գնում նման համաձայնությունների։
Միջազգային փորձը ցույց է տալիս, որ բազմաթիվ համաձայնագրեր չեն իրագործվում։ Եթե ադրբեջանական կողմը չդիմի ռազմաքաղաքական ավելի մեծ ճնշումների, և եթե հայկական կողմն իր հերթին կարողանա դիմակայել արդեն իսկ առկա ճնշումներին, ապա չի բացառվում, որ այս իրավիճակը, ըստ փորձագետի, որոշ ժամանակ կպահպանվի, և մեր դիմակայության դեպքում Ադրբեջանի ծրագրերը կմնան կաթվածահար վիճակում։
Նշենք, որ Արցախի ՊԲ մամուլի ծառայության տարածած հաղորդագրության համաձայն` օգոստոսի 12-ի գիշերը Ադրբեջանի ԶՈւ ստորաբաժանումները Արցախի Հանրապետության արևմտյան հատվածում փորձել են հատել արցախա-ադրբեջանական հակամարտ զորքերի շփման գիծը։
Նույն աղբյուրի տեղեկատվությամբ` Պաշտպանության բանակի հակազդող գործողությունների արդյունքում փորձը կանխվել է, հակառակորդը ետ է շպրտվել ելման դիրքեր։ Հայկական կողմից կորուստներ չկան։
Հիշեցնենք, որ օգոստոսի 11-ին՝ ժամը 08:29-ի և 08:58-ի սահմաններում հակառակորդը հարվածային անօդաչու թռչող սարքեր էր կիրառել Պաշտպանության բանակի մարտական դիրքերի ուղղությամբ: