Հավանաբար համավարակի հետ կապված նոր հրահանգ կլինի, որովհետև իրավիճակը նախորդ տարիների համեմատ որոշ չափով փոխվել է թե՛ վարակի ուժգնության, թե՛ պատվաստանյութերի առկայության առումով։ Այսօր ուշադրություն է հատկացվում փակ տարածքներին, որտեղ վարակի տարածման հավանականությունն ավելի մեծ է, իսկ բացօթյա տարածքներում ռիսկերը համեմատաբար փոքր են, Sputnik Արմենիայի հետ զրույցում նման կարծիք հայտնեց Արման Բադալյանը։
«Բայց նույնիսկ եթե ռիսկը կա և թեկուզ այն մեծ չէ, միևնույնն է, կա ընդհանուր տրամադրվածություն։ Այն մարդիկ, որոնք գտնվում են բարձր խտությամբ հանրային սննդի վայրերում, մեծ մասամբ տոկոսային հարաբերությունների ու հավանականությունների մասին ոչ միայն չգիտեն, այլ նաև չեն մտածում, ինչը մեծ խնդիր է։ Դրսում յուրաքանչյուր գործողություն պետք է կշռադատել, և եթե բոլորն այդպես վարվեն, համոզված եմ, որ սրճարաններում, հանրային սննդի վայրերում առկա պատկերը չէինք տեսնի»,– ասաց վարակաբանը։
Բադալյանի կարծիքով` խնդիրն ունի հոգեբանական հենք և կապված է պատասխանատվության զգացումի հետ, որովհետև համավարակային վիճակին առնչվող որոշումները շատ դեպքերում արհամարհվում են։ Ոմանք կարող են ասել, թե վարակվելուց հետո արդեն բուժվել են, ոմանք կարող են ասել, որ արդեն պատվաստվել են, բայց նման պնդումները, ըստ համաճարակաբանի, բթացնում են մարդկանց զգոնությունը. բոլոր դեպքերում կանոնները պետք է պահպանվեն։
Հիշեցնենք` 2020թ.–ի մարտի 16–ից Հայաստանում արտակարգ դրություն էր սահմանված, որը մի քանի անգամ երկարաձգվեց և տևեց մինչև սեպտեմբերի 11–ը։ Երկարաձգված արտակարգ դրության պայմանները որոշակի փոփոխությունների ենթարկվեցին։
2021-ի հունիսի 1-ից բաց տարածքներում դիմակ դնելու պահանջը վերացվեց, իսկ պատվաստված քաղաքացիների համար փակ տարածքներում դիմակ դնելը պարտադիր չէ հուլիսի 1-ից։
2020թ.–ի սեպտեմբերի 11–ին ՀՀ կառավարությունը որոշեց, որ երկրում սեպտեմբերի 12–ից մինչև 2021թ.–ի հունվարի 11–ը կգործի կարանտինի ռեժիմ։ Այն երկարաձգվել էր մինչև 2021թ.–ի հուլիսի 11–ը։ Հուլիսի 9–ին որոշում կայացվեց կարանտինը երկարաձգել մինչև 2021թ.–ի դեկտեմբերի 20–ը։