ԵՐԵՎԱՆ, 10 օգոստոսի -Sputnik. Բնակարան Իսպանիայում, առանձնատուն Վահագնի թաղամասում, 2 բնակարան Երևանի Դեմիրճյան փողոցում, ավտոմեքենաներ, հողամասեր և 8 մլն դրամը գերազանցող մի քանի թանկարժեք գույք։
ԱԺ նիստում այսօր ՔՊ անդամ Սարգիս Խանդանյանը ներկայացրեց «Հայաստան» դաշինքի կողմից ԱԺ տնտեսական հարցերի մշտական հանձնաժողովի նախագահի պաշտոնում առաջադրված պատգամավոր, Սյունիքի նախկին մարզպետ Վահե Հակոբյանի` ԿԸՀ ներկայացրած հայտարարագրի բովանդակությունն ու հետաքրքրվեց. «Ո՞րն է ձեր հաջողության գաղտնիքը»։
«Հաջողության գաղտնիքը շատ պարզ է` երբ ես լքեցի պետական ծառայությունը, սկզբից պայմանագրային եղանակով սկսեցի աշխատել «Քրոնիմետ Մայնինգ» ընկերության հետ, հետո արդեն դառա թիմի անդամ»,– ասաց Հակոբյանը։
Ինչ վերաբերում է հայտարարգրված գույքին, պատգամավորը վստահեցրեց, որ Երևանի երկու բնակարանները ձեռք են բերվել 100 տոկոս վարկով, Իսպանիայի բնակարանը` 80 տոկոսանոց վարկով։
«Ինչ կա, էդ ա։ Ասեմ ավելին, երեք տարի է ձեր թիմը` ուժային համակարգը, փորձում է ինչ–որ բան գտնի։ Դե ինչ որ գտնեք, ձերն ա` հայտարարագրից դուրս»,– ասաց Հակոբյանը։
Նշենք, որ բացի վերոհիշյալ բնակարաններից, Վահե Հակոբյանը ԿԸՀ ներկայացրած հայտարարգրում գրանցել է նաև 17 000 ԱՄՆ դոլար արժեքով Hublot ժամացույց, 11 մլն և 12 մլն ՀՀ դրամ արժողությամբ Vocheron Constonti և Breguet ժամացույցներ, Մարտիրոս Սարյանի երկու նկարներ` 18 և 150 հազար ԱՄՆ դոլար արժեքով և Հովհաննես Այվազովսկու 1 նկար` 200 000 ԱՄՆ դոլար արժեքով ։
Ըստ հայտարարագրի, Զանգեզուրի պղնձմոլիբդենային կոմբինատում Հակոբյանի տարեկան աշխատավարձը կազմել է 72 մլն դրամ։
«Հայաստան» դաշինքն այսօր պատգամավոր, Սյունիքի նախկին մարզպետ Վահե Հակոբյանի թեկնածությունն առաջադրել է ԱԺ տնտեսական հարցերի մշտական հանձնաժողովի նախագահի պաշտոնում։