ԵՐԵՎԱՆ, 10 օգոստոսի - Sputnik. ՀՀ վարչապետ Նիկոլ Փաշինյանն այսօր ընդունել է Սոցիալ Դեմոկրատ Հնչակյան կուսակցության ներկայացուցիչներին՝ Կենտրոնական վարչության ատենապետ Համբիկ Սարաֆյանին, Կենտրոնական վարչության անդամ Խաչիկ Քեշիշյանին և Հայաստանի վարչության ատենապետ Սեդրակ Աճեմյանին: Տեղեկությունը հայտնում է վարչապետի մամուլի ծառայությունը։
Վարչապետն ուրախությամբ արձանագրել է, որ ՍԴՀԿ-ն մասնակցում է արտախորհրդարանական ուժերի նոր ձևաչափին, որի շրջանակում արդեն երկու հանդիպում կայացել է:
«Այս համագործակցությունը և երկխոսությունը շատ կարևոր է մեզ համար՝ հաշվի առնելով կուսակցության շատ կարևոր և բացառիկ դերը սփյուռքի մեր համայնքներում, ներգրավվածությունը և ներդրումն ընդհանրապես հայ ժողովրդի քաղաքական մշակույթի ձևավորման գործում։ Մենք միշտ բաց ենք եղել երկխոսության համար, և ուրախ եմ, որ նույնպիսի պատրաստակամություն կա նաև ձեր կողմից», - նշել է վարչապետ Փաշինյանը։
Նա ընդգծել է՝ այս հանդիպումները լավ առիթ են արտահերթ խորհրդարանական ընտրություններից օրակարգը ճշգրտելու, առաջիկա անելիքների վերաբերյալ մտքեր փոխանակելու համար։
ՍԴՀԿ Կենտրոնական վարչության ատենապետ Համբիկ Սարաֆյանը նշել է, որ հիմա մեր պատմության երևի ամենաճակատագրական ժամանակահատվածում ենք։
«Ինչպես տեսանք, նաև ընտրություններից հետո Ձեր կատարած քայլերը, մանավանդ միասնականությանը և համախմբվածությանն ուղղված մոտեցումները և՛ խորհրդարանական, և՛ արտախորհրդարանական ձևաչափով, կարծում ենք, շատ ճիշտ են: Որովհետև եթե նախկինում միասնականության, համագործակցության, համերաշխության մասին կոչերը ցանկություններ էին, այսօր ուղղակի բացարձակ անհրաժեշտություն են, որովհետև եթե մենք համագործակցաբար, միասնականության մթնոլորտի մեջ չկարողանանք աշխատել, շատ դժվար է լինելու ապագան»,- շեշտել է Սարաֆյանը։
Նա հավելել է, որ կուսակցությունը միշտ պատրաստակամ է համագործակցել կառավարության հետ բոլոր ոլորտներում՝ թե՛ սփյուռքում, թե՛ Հայաստանում։ Շեշտել է, որ այսօր առավել կարևոր է համագործակցությունը բոլոր ուժերի հետ, որովհետև դա թերևս միակ ձևն է, որով «կարողանանք մեր հայրենիքը, Արցախն այս ծանր իրավիճակից դուրս բերել»։