ԵՐԵՎԱՆ, 9 օգոստոսի – Sputnik. Կառավարության շենքի առջև գերիների` բողոքի ակցիա անող հարազատները հրաժարվեցին մտնել կառավարության շենք և քննարկում ունենալ։
Հայտնել էինք, որ գերիների հարազատները կառավարության առջև բողոքի ակցիա են անում` պահանջելով, որպեսզի կառավարությունից իրենց պատասխան տան` ե՞րբ են վերադառնալու իրենց զավակները։
Քիչ առաջ կառավարությունից ոստիկանների միջոցով առաջարկեցին 2 հոգով մտնել կառավարություն, որպեսզի վարչապետի աշխատակազմից ինչ–որ մեկի հետ քննարկում ունենան, սակայն բողոքի ակցիա անողները հրաժարվեցին։
«Կամ բոլորս ներս կմտնենք, կամ ոչ ոք։ Ի՞նչ է նշանակում երկու հոգի։ Գիտե՞ք` ինչքան դժվար է, որ երկուսը մտնեն ու գան մյուսներին` 45 հոգու պատմեն, թե ինչ է եղել»,–ասացին գերիների հարազատները։
Ի դեպ, թե ով պետք է ընդուներ նրանց, այդպես էլ հստակ չէր` հարազատները միայն նշեցին` հասկացել են, որ անձամբ Փաշինյանը չի ընդունելու իրենց։
Այսպիսով, գերիների հարազատները մերժեցին քննարկման գնալ երկու հոգով ասելով, որ իրենք բոլորին պետք է ընդունեն։
Հիշեցնենք, որ հուլիսի 3-ին հայրենիք վերադարձան ևս 15 գերի. հայ գերիների վերադարձի դիմաց հայկական կողմն Ադրբեջանին է փոխանցել Վարանդայի (Ֆիզուլի) և Կովսականի (Զանգելանի) ականապատ դաշտերի քարտեզները։
Այսպիսով, Հայաստան վերադարձած գերիների ընդհանուր թիվը 103-ն է։ Ի դեպ, երբ Հայաստան վերադարձած գերիների թիվը 88 էր, վարչապետի պաշտոնակատար Նիկոլ Փաշինյանը հայտարարել էր, որ Ադրբեջանում պահվող հայ գերիների ճշտված թիվը 60 է, չճշտվածը՝ 110։
Ոչ պաշտոնական տվյալներով՝ Ադրբեջանում շարունակում են մնալ մոտ 200 հայ գերիներ։