ԵՐԵՎԱՆ, 8 օգոստոսի – Sputnik. Instagram-ի իր ուղիղ եթերում երգիչ Անդրեն բացատրել է իր հետևորդներին, թե ինչ ֆորմատով է հանդիպելու իր արցախցի երկրպագուների հետ Ստեփանակերտի Վերածննդի հրապարակում այսօր ժամը 20:00-ին։
«Դուք պետք է դավաճանների պաստառները պոկեք, ոչ թե իմ․․․ Ես համերգ չեմ անցկացնելու Ստեփանակերտում, դա հանդիպում է լինելու արցախցիների հետ», - ասել է Անդրեն։
View this post on Instagram
Ավելի վաղ Ստեփանակերտում տեղադրված Անդրեի պաստառներն անհետ կորած զինծառայողներից մեկի ծնողը պոկել էր՝ ասելով․ «Խոխիս կպիրաք, նոր կանցերտ կտաք»։
Արցախի պետական նախարար Արտակ Բեգլարյանն այս առիթով Facebook-ում նշել է, որ Արցախում առնվազն մինչև նոյեմբերի 11-ը որևէ համերգ չի կազմակերպվելու։
«Այս որոշման նպատակն այն է, որ քանի դեռ 2020թ. պատերազմի զոհերի տարին չի լրացել, մենք խոշորամասշտաբ համերգային միջոցառումներ չպետք է կազմակերպենք՝ հաշվի առնելով հասարակության մեջ ընդունված բարոյական կանոններն ու արժեքները: Կարծում եմ՝ այդ առումով մեկ տարին ողջամիտ ժամկետ է հանրային նման միջոցառումների սահմանափակման համար: Այս որոշումը կայացրել ենք ոչ միայն այն պատճառով, որ մենք էլ ենք այդպես կարծում, այլև հատկապես այն նպատակով, որ կանխենք հասարակության մեջ երկպառակտում խթանող միջադեպերն ու վեճերը», - գրել է Բեգլարյանը։
Անդրադառնալով Անդրեի համերգի թեմային՝ Բեգլարյանը գրել է, որ գլխավոր խնդիրը ոչ արդյունավետ հաղորդակցությունն էր լիազոր մարմինների հետ:
Մասնավորապես, տվյալ հարցով զբաղվել է մշակույթի ոլորտում որևէ լիազորություն չունեցող պաշտոնատար անձ ու մարմին, և ԿԳՄՍ նախարարն ու պետնախարարը պլանավորվող համերգի մասին տեղեկացել են հայտարարության տարածումից օրեր անց՝ օգոստոսի 5-ին:
«Ես նույն օրը զանգահարել եմ Անդրեին, հարցը քննարկել նրա հետ ու առաջարկել համերգը տեղափոխել Ստեփանակերտի մշակույթի ու երիտասարդության պալատ: Եվ այդ նույն առաջարկը կանեի, եթե Անդրեի փոխարեն մեկ այլ (ներառյալ՝ աշխարհահռչակ) մշակութային գործիչ լիներ», - գրել է Արցախի պետական նախարարը։
Բեգլարյանը վերջում նշել է, որ համոզված է, որ Անդրեն որևէ նպատակ չի ունեցել անհարգալից կերպով վերաբերվելու զոհերի հարազատներին, ընդհակառակը՝ որոշել է իր ներկայությամբ ու արվեստով սատար կանգնել իր հայրենակիցներին: