ԵՐԵՎԱՆ, 8 օգոստոսի – Sputnik. Այսօր Տոկիոյում Հայաստանի օլիմպիական հավաքականի անդամ Հովհաննես Բաչկովը ստացավ իր նվաճած մեդալը։
Տոկիո-2020-ի օլիմպիական խաղերի բռնցքամարտի 63 կգ քաշային կարգի կիսաեզրափակիչում Հայաստանի ներկայացուցիչ Հովհաննես Բաչկովն օգոստոսի 6–ին բրոնզե մեդալ նվաճեց։ Կիսաեզրափակիչում Բաչկովը միավորներով պարտվեց ամերիկացի Քեյշոն Դևիսին։
Մինչև կիսաեզրափակիչ մենամարտը օլիմպիական մրցաշարի 1/16 եզրափակիչում Բաչկովը 5։0 հաշվով հաղթել էր Անտիգուա և Բարբուդայի ներկայացուցիչ Ալստոն Ռայանին, 1/8 եզրափակիչում հայ բռնցքամարտիկը 4։1 հաշվով գեղեցիկ հաղթանակ էր տոնել ադրբեջանցի Ջավիդ Չալաբիևի նկատմամբ և քառորդ եզրափակիչում 5։0 հաշվով պարտության էր մատնել ուզբեկ Էլնուր Աբդուռահիմովին։
Տոկիոյի օլիմպիական խաղերում Հայաստանի օլիմպիական հավաքականը ավարտել է իր ելույթները չորս մեդալով։ Մենք ունենք արծաթե և բրոնզե երկուական մեդալ. արծաթե մեդալակիր են դարձել Արթուր Ալեքսանյանն ու Սիմոն Մարտիրոսյանը, իսկ բրոնզե մեդալակիրներն են Արթուր Դավթյանն ու Հովհաննես Բաչկովը։