ԵՐԵՎԱՆ, 7 օգոստոսի - Sputnik. ԱԺ նախկին պատգամավոր, «Անվտանգություն և ժողովրդավարություն» իրավապաշտպան կազմակերպության նախագահ Նաիրա Զոհրաբյանը դիմել է միջազգային մի շարք կազմակերպությունների, որոնց անմիջական մանդատի տակ են մարդու՝ իր բնակավայրում խաղաղ ապրելու և աշխատելու իրավունքի հարցերը։ Տեղեկությունը Զոհրաբյանը հայտնել է Facebook-ի իր էջում։
«Ադրբեջանական զինված ուժերի պարբերական կրակոցները կոպտագույն կերպով խախտում են Երասխի և հարակից բնակավայրերի բնակիչների իրավունքները, իսկ հստակ դիտավորությամբ կազմակերպված հրդեհները անհնարին են դարձնում գյուղատնտեսական աշխատանքները»,- գրում է Զոհրաբյանը։
Նա նաև հիշեցնում է, որ օգոստոսի 5-ին պաշտպանության նորանշանակ նախարարը հրաման էր տվել թեկուզ մեկ սանտիմետր առաջ եկող ադրբեջանցու վրա կրակել։
Հիշեցնենք՝ նախօրեին ադրբեջանական զինծառայողները հրդեհել են Արարատի մարզի Երասխ գյուղի անմիջական հարևանությամբ քաղաքացիներին՝ սեփականության իրավունքով պատկանող հողատարածքները: Ադրբեջանի ԶՈւ-ն շարունակում է խախտել հրադադարն ու տարբեր տրամաչափի զինատեսակներից պարբերաբար կրակել Երասխի և հարակից տարածքների ուղղությամբ: